شہزاد اکبر کا رکن پنجاب اسمبلی نذیر چوہان پر مقدمہ

وزیراعظم پاکستان کے مشیر برائے داخلہ شہزاد اکبر نے تحریک انصاف سے تعلق رکھنے والے جہانگیر ترین گروپ کے رکن پنجاب اسمبلی نذیر چوہان کے خلاف لاہور کے تھانہ ریس کورس میں ایف آئی آر درج کروائی ہے۔

سنیچر کو درج کروائی جانے والی ایف آئی آر کے مطابق رکن پنجاب اسمبلی نذیر چوہان نے نجی ٹی وی چینل پر شہزاد اکبر کے خلاف بے بنیاد الزامات عائد کیے ہیں۔

ایف آئی آر کے متن کے مطابق ’نذیر چوہان نے بدنام کرنے کی غرض سے ایسے الزامات عائد کیے ہیں جس سے درخواست کنندہ کی زندگی کو خطرات لاحق ہو سکتے ہیں۔ ان الزامات سے درخواست گزار کے مذہبی جذبات کو بھی ٹھیس پہنچی ہے۔‘

ایف آئی آر کے مطابق درخواست گزار شہزاد اکبر ملک میں کرپشن کے خلاف اور احتساب کے عمل میں اہم کردار ادا کر رہے ہیں اور ان الزامات کا مقصد پاکستان میں احتساب کے عمل کی حوصلہ شکنی کرنا ہے۔ 

خیال رہے کہ رکن پنجاب اسمبلی نذیر چوہان نے ایک نجی ٹی وی کے پروگرام کے دوران شہزاد اکبر پر الزامات عائد کیے تھے۔

نذیر چوہان تحریک انصاف کے رکن پنجاب اسمبلی ہیں اور وہ حال ہی میں منظر عام پر آنے والے ترین گروپ کے اہم رکن ہیں۔ 

ایف آئی آر کے مطابق درخواست گزار اپنی ذمہ داریاں بخوبی نبھا رہے ہیں اور ان پر اس سے قبل بھی اس قسم کے الزامات عائد کیے گئے ہیں تاکہ ان کو قانونی ذمہ داریاں ادا کرنے سے روکا جا سکے۔ 

’ان بے بنیاد الزامات سے عوامی سطح پر نفرت کو ابھارا جا رہا ہے جس سے ان کی زندگی بھی خطرے میں ہے۔‘

مشیر داخلہ شہزاد اکبر نے رکن پنجاب اسمبلی نذیر چوہان کے خلاف سخت قانونی کارروائی کرنے کی درخواست کی ہے۔ 

وفاقی وزیر اطلاعات و نشریات فواد چوہدری نے بھی لاہور پولیس سے نذیر چوہان کے خلاف سخت کارروائی کرنے کا مطالبہ کیا ہے۔ 

اپنی ٹویٹ کے میں وفاقی وزیر اطلاعات نے کہا کہ ‘ذاتی دشمنی کے لیے مذہبی کارڈ کا استعمال کرنا قابل مذمت ہے۔ لاہور پولیس شہزاد اکبر کے خلاف اوچھے ہتھکنڈے اپنانے پر رکن پنجاب اسمبلی نذیر چوہان کے خلاف سخت کارروائی کرے۔‘

فواد چوہدری نے مزید کہا کہ ’شہزاد اکبر اپنی ذمہ داریاں نبھا رہے ہیں۔ اگر ریاست اس طرح کے حملوں کے خلاف اپنے عہدیداروں کی حفاظت میں ناکام رہتی ہے تو وہ کام نہیں کر سکتی۔‘

دوسری جانب نجی ٹی وی چینل کے مطابق نذیر چوہان نے لاہور میں میڈیا سے گفتگو کرتے ہوئے کہا ہے کہ ’پنجاب پولیس نے شہزاد اکبر کے کہنے پر جھوٹی ایف آئی آر درج کی ہے۔ اپنے خلاف ایف آئی آر پر گرفتاری پیش کروں گا اور ضمانت قبل از گرفتاری نہیں کراؤں گا۔‘