کاروبار رات آٹھ بجے تک، ان ڈور ڈائننگ پر دوبارہ پابندی: اسد عمر

وفاقی وزیر برائے منصوبہ بندی اسد عمر نے کورونا وائرس کی صورتحال پر بریفنگ دیتے ہوئے کہا ہے کہ کاروبار رات آٹھ بجے تک بند ہو جائے گا اور ان ڈور ڈائننگ پر دوبارہ پابندی لگانے کا فیصلہ کیا ہے۔

پیر کو پریس کانفرنس سے خطاب میں اسد عمر نے کہا کہ کورونا وائرس پر قابو پانے کے لیے نئی پابندیوں کا اطلاق تین اگست سے 31 اگست تک ہو گا۔

انہوں نے کہا کہ ان ڈور ڈائننگ کو بند کیا جا رہا ہے جبکہ مارکیٹیں آٹھ بجے تک کھلی رہیں گی۔

یہ نئی بندشیں کراچی، حیدر آباد، راولپنڈی، لاہور، فیصل آباد، اسلام آباد، گلگت، سکردو، مظفر آباد اور میرپور میں لگیں گی۔‘

اسد عمر نے کہا ہے کہ وزیراعظم سےمنظوری لینے کے بعد ہم نے کچھ فیصلے کیے ہیں۔

ان کا مزید کہنا تھا کہ ٹیک اوے اور ہوم ڈلیوری کی 24 گھنٹے اجازت ہوگی۔ پبلک ٹرانسپورٹ میں سواریوں کی گنجائش 50 فیصد ہو گی۔

خیال رہے کہ اتوار کو وزیراعظم عمران خان نے عوام سے خطاب میں کہا تھا کہ ملک میں کورونا کی چوتھی لہر زیادہ خطرناک ہے لیکن اس کے ساتھ انھوں نے کہا تھا کہ ہم لاک ڈاؤن کر کے کسی بھی صورت اپنی معیشت کو تباہ نہیں کریں گے۔ لاک ڈاؤن کا مطلب لوگوں کو بھوکا رکھنا ہے۔

اتوار کو ہی پاکستان میں کورونا ویکسینیشن کے سرٹیفکیٹ کے بغیر اندرون ملک فضائی سفر پر پابندی کا نفاذ کر دیا گیا تھا اور سول ایوی ایشن حکام کے مطابق ملک کے تمام ایئر پورٹس پر مسافروں کے ویکسینیشن سرٹیفکیٹ دیکھے جا رہے ہیں۔