ٹرین سے گرنے والے نوجوان کی جان بچانے پر کانسٹیبل کے لیے ’اعزاز‘

وزیراعظم عمران خان نے چلتی ٹرین سے ٹریک پر گرنے والے نوجوان کو بچانے والے پولیس کانسٹیبل جمیل کلھوڑو کو ان کی خدمت کے اعتراف میں اعزاز سے نوازنے کا اعلان کیا ہے۔

جمعے کو اپنی ایک ٹویٹ میں وزیراعظم عمران خان نے لکھا کہ ’ہم نے کانسٹیبل جمیل کلھوڑو کی اپنے فرائض کی انجام دہی کی لگن دیکھتے ہوئے انہیں 23 مارچ یوم پاکستان پر اعزاز سے نوازنے کا فیصلہ کیا ہے۔‘

نوجوان کو ٹرین کے نیچے سے بچانے والے پولیس کانسٹیبل کا کارنامہ وزیراعظم عمران خان کو بھی بھا گیا اور انہیں اپنے انداز میں خراج تحسین پیش کیا۔

جمعرات کے روز پاکستان کے وزیراعظم عمران خان نے اپنے سوشل میڈیا اکاؤنٹس پر صوبہ سندھ کے ایک پولیس کانسٹیبل کی ویڈیو لگائی جس نے حاضر دماغ دکھاتے ہوئے ایک نوجوان کو ٹرین کے نیچے آنے سے بچایا تھا۔

وزیراعظم عمران خان نے اپنی ایک ٹویٹ میں لکھا کہ ’یہ وہ مقام ہے جہاں فرض تقدیس سے ہمکنار ہوتا ہے۔’عوام الناس کی خدمت کے حوالے سے اس نوجوان سپاہی کے ہاں دکھائی دینے والا عزم قابل تحسین ہے۔‘

ویڈیو میں دیکھا جاسکتا ہے کہ ایک سٹیشن سے ٹرین گزرہی ہے جس کی چھت پر بھی مسافروں کی ایک بڑی تعداد سوار ہے۔ ایسے میں ایک نوجوان کا پاؤں پھسلتا ہے اور وہ ٹرین اور پٹریوں کے درمیان خلا میں پھنس جاتا ہے۔

اگلے ہی لمحے وہاں ڈیوٹی پر کھڑا پولیس کانسٹیبل تیری سے نوجوان کی طرف بھاگتا ہے اور کھینچ کر اسے کسی حادثے سے بچا لیتا ہے۔

ایک صارف نے فیس بک پر بھی یہ ویڈیو شئیر کی اور دعویٰ کیا کہ یہ ویڈیو صوبہ سندھ کے روہڑی سٹیشن کی ہے اور پولیس کانسٹیبل کا نام جمیل کلھوڑو ہے۔

جہاں لوگوں نے پولیس کانسٹیبل کو سراہا وہیں کچھ لوگ وزیراعظم سے پاکستان ریلویز کی صورتحال پر سوال کرتے ہوئے نظر آئے۔

ایک ٹوئٹر صارف جہانگیر خانزادہ کہتے ہیں کہ ’مسٹر عمران خان اپنے ریلوے منسٹر سے پوچھیں کہ آخر اتنے سارے لوگ ٹرین کی چھت پر پہنچے کیسے؟‘

ایک اور صارف سید احمد بھی محکمہ ریلوے کی حالت پر ناخوش نظر آئے۔

’ڈیئر وزیراعظم عمران خان کیا آپ نے اپنے ریلوے منسٹر سے پوچھا کہ لوگ ٹرین کی چھت پر سفر کیوں کررہے ہیں؟ کیا ایسا کرنا محفوظ ہے؟‘