طلاق یافتہ جوڑے کے آرٹ کلیکشن سے ایک شام میں 67 کروڑ ڈالر کی کمائی

امریکہ کے شہر نیو یارک کے سدھبیز نیال گھر میں میک لؤ آرٹ کلیکشن میں شامل فن پاروں سے ایک رات میں 67 کروڑ 60 لاکھ ڈالر کمائے گئے ہیں۔ اس میں امریکی پینٹر مارک روتھکو کی بھی ایک پینٹنگ شامل ہے جو کہ آٹھ کروڑ ڈالر سے زائد میں نیلام ہوئی۔

خبر رساں ادارے اے ایف پی کے مطابق یہ نیویارک شہر میں 2021 کے موسمِ خزاں کی سب سے نمایاں نیلامی تھی جو کہ دو گھنٹوں سے زائد کے دورانیے تک جاری رہی۔

اس دوران کلیکشن کے تمام 35 فن پارے فروخت ہوئے۔ ان میں سے چار، پانچ کروڑ ڈالر سے زائد کی قیمت پر نیلام ہوئے۔

سدھبیز ہیدکوارٹر میں ہونے والی نیلامی میں دو سو سے تین سو افراد کو شرکت کی اجازت تھی۔ اس سے قبل کورونا وائرس کی وبا کے باعث نیلامی کے کئی سیزن آن لائن منعقد کیے گئے تھے۔

دو فن پاروں کو اس شام کے مہنگے ترین آئٹم قرار دیا جا رہا تھا۔

تاہم آخر میں مارک روتھکو کی پینٹنگ سب سے زیادہ قیمت میں نیلام ہوئی۔ اس پینٹنگ کے لیے فیس اور کمیشن سمیت آٹھ کروڑ 24 لاکھ ڈالر ادا کیے گئے۔

مارک روتھکو کی پینٹنگ نے سویس آرٹسٹ ایلبرٹو جکومیٹی کی پینٹنگ کو پیچھے چھوڑ دیا۔

سدھبیز انتظامیہ کا کہنا تھا کہ دونوں فن پاروں کو ایشین کلیکٹرز نے خریدا ہے۔

نیویارک میں پاپ آرٹ کے ماسٹر اینڈی وارہول کی دو پینٹنگز کی فروخت بھی سب سے زیادہ متوقع تھی۔

ان کی مشہور پینٹنگ ’نائن میریلئنز‘ چار کروڑ 73 لاکھ میں نیلام ہوئی۔ یہ فن پارہ فلم سٹار میریلئن مونرؤ کے چہرے کی بلیک اینڈ واٹ میں پینٹنگ کی سیریز ہے۔

ان کی دوسری پینٹنگ ’سکسٹین جیکیز‘ تین کروڑ 38 لاکھ ڈالر میں نیلام ہوئی۔ اس میں امریکی مصنف جیکی کینیڈی کی تصویر کشی کی گئی ہے۔

میل لؤ کلیکشن کس کی تھی؟

سال 2018 میں ریئل اسٹیٹ کا کام کرنے والے ہیری میک لؤ اور لنڈا برگ کی طلاق ہوگئی تھی۔ اس جوڑے کے پاس ایک متاثر کن آرٹ کلیکشن تھا، جس کا نام میک لؤ ہے، اور جو سدھبیز میں نیلامی پر تھا۔

پیر کی رات کو اس کلیکشن کے 65 فن پاروں میں سے 35 فروخت ہوئے۔ باقی کے فن پارے 2022 میں نیلامی کے اگلے سیزن میں فروخت ہوں گے۔

تاہم ایک شام میں 67 کروڑ 60 لاکھ ڈالر کما کر یہ کلیکشن 2018 کے راک فیلر کلیکشن کا ریکارڈ توڑ سکتا ہے۔

یاد رہے کہ راک فیلر کلیکشن برطانوی نیلام گھر کرسٹیز میں 83 کروڑ 50 لاکھ ڈالر میں فروخت ہوا تھا۔