عرب اتحاد کا یمن میں حوثیوں کی ڈرون لیب پر حملہ

عرب اتحاد نے بدھ کو کہا ہے کہ اس کی جانب سے یمن کے دارالحکومت میں فوجی سائٹس کو جائز طور پر نشانہ بنایا گیا ہے۔

عرب نیوز کے مطابق ایک زیر تعمیر عمارت کو اس لیے نشانہ بنایا گیا کیونکہ اس کو دھماکہ خیز مواد لے جانے والے ڈرونز کی تیاری کے لیے استعمال کیا جا رہا تھا۔

سعودی عرب کے بارڈر کے دونوں اطراف حملوں کے لیے ڈرونز ایرانی حمایت یافتہ حوثیوں کا بنیادی انتخاب رہے ہیں۔

عرب اتحاد کی جانب سے عام شہریوں کو کہا گیا ہے کہ وہ صنعا میں ٹارگٹ کیے جانے والے علاقوں سے دور رہیں۔

منگل کو بھی عرب اتحاد نے کہا تھا کہ یمن کے دارالحکومت پر فضائی حملے کیے گئے۔

اتحاد کے مطابق ’فضائی حملوں میں بلیسٹک میزائلز کے ذخیرے کو نشانہ بنایا گیا۔‘

پیر کو عرب اتحاد کی جانب سے بتایا گیا تھا کہ حوثیوں نے صنعا ایئرپورٹ کو فوجی بیس میں تبدیل کر دیا ہے، جہاں تجربات کیے جا رہے ہیں اور بارڈر کے اطراف کو حملوں کے لیے بھی استعمال کیا جا رہا ہے۔