انڈیا کے زیر انتظام کشمیر کے مندر میں بھگدڑ سے 12 ہلاک، 13 زخمی

انڈیا کے زیر انتظام کشمیر کے ماتا ویشنو دیوی کے مندر میں بھگدڑ کی وجہ سے 12 یاتری ہلاک اور 13 زخمی ہوئے ہیں۔ 

فرانسیسی خبر رساں ادارے اے ایف پی کے مطابق حکام کا کہنا ہے کہ سنیچر کو علی الصبح ماتا ویشنو دیوی کے مندر میں یاتریوں کے رش کی وجہ سے یہ واقعہ پیش آیا۔

حکام نے ہلاکتوں میں اضافے کا خدشہ ظاہر کیا ہے۔

انڈین ٹی وی چینل این ڈی ٹی وی کے مطابق وزیراعظم نریندر مودی واقعے کے بعد ذاتی طور پر صورتحال کا جائزہ لے رہے ہیں۔

یاتریوں کی ایک بڑی تعداد نئے سال کے موقعے پر عبادت کے لیے آئی تھی۔ یہ واقعہ اس وقت پیش آیا جب یاتری ویشنو دیوی بھون میں داخل ہو رہے تھے۔

وزیراعظم نریندر مودی نے سوگوار خاندانوں سے تعزیت کرتے ہوئے کہا ہے کہ وہ ماتا ویشنو دیوی بھون میں بھگڈر کی وجہ سے ہلاکتوں پر انتہائی غمزدہ ہیں۔

انہوں نے نیشنل ریلیف فنڈ سے ہلاک ہونے والوں کے لیے دو لاکھ جبکہ زخمیوں کے لیے 50 ہزار روپے کا اعلان کیا ہے۔

انڈیا کے زیر انتظام کشمیر کے لیفٹیننٹ گورنر منوج سنہا نے اپنے ٹوئٹر بیان میں کہا کہ ان کو مندر میں بھگڈر کی وجہ سے ہونے والے جانی نقصان پر انتہائی دکھ ہے۔

انہوں نے کہا کہ وزیراعظم نریندر مودی کو واقعے کے بارے میں بریف کیا ہے۔

لیفٹیننٹ گورنر منوج سنہا نے ہلاک شدگان کے خاندانوں کے لیے دس لاکھ روپے اور زخمیوں کو دو لاکھ روپے دینے کا اعلان کیا ہے۔

ماتا ویشو دیوی کا مندر ہندوؤں کے اہم عبادت گاہوں میں سے ایک ہے۔ ہر روز ہزاروں افراد ماتو ویشو دیوی مندر میں عبادت کرنے جاتے ہیں۔

ماتا ویشو دیوی 24 گھنٹے کھلا رہتا ہے۔ یہ جموں سے 30 کلومیٹر کے فاصلے پر کترا کی پہاڑیوں میں واقع ہے۔