پارلیمان کو نئے ججز کی تعیناتی کے لیے آئینی ترمیم پر غور کرنا چاہیے: فواد چوہدری

پاکستان کے وفاقی وزیر اطلاعات فواد چوہدری نے کہا ہے کہ پارلیمان کو نئے ججز کی تعیناتی کے لیے آئینی ترمیم پر غور کرنا چاہیے۔

فواد چوہدری نے پیر کو اپنی ٹویٹ میں لکھا کہ ’اس سال سپریم کورٹ میں پانچ جج صاحبان ریٹائر ہو رہے ہیں پارلیمان کو نئے ججز کی تعیناتی کیلئےآئینی ترمیم پر غور کرنا چاہئے۔‘

’اگر پارلیمان سپریم کورٹ میں تعیناتیوں کو آزادانہ اور شفاف بناتی ہے، تو یہ بہت بڑا کام ہو گا۔‘  انہوں نے لکھا کہ ’سیاسی جماعتیں اپنے اختلافات کو پس پشت ڈال کر اس اہم ترمیم کیلئے سر جوڑیں۔‘

انہوں نے اپنی دوسری ٹویٹ میں ریٹائر ہونے والے چیف جسٹس آف سپریم کورٹ جسٹس گلزار احمد کے کے حوالے سے لکھا کہ ’جسٹس گلزار آج ریٹائر ہو رہے ہیں۔ انہوں نے اقلیتوں کی عبادت گاہوں کو لے کر جو تاریخی سٹینڈ لیا، اس سے ان کی عزت و تکریم میں بہت اضافہ ہوا۔

’ایسے وقت میں جب ہندوستان کی عدلیہ شدت پسندوں کے ہاتھوں بے بس نظر آتی ہے، جسٹس گلزار جیسے ججز نے اقلیتوں کو سہارا دیا اور آزادانہ فیصلے دیے۔‘