’مالدیپ جانے والے سعودی شہری ضوابط کی پابندی کریں‘

مالدیپ میں سعودی سفارتخانے نے کہا ہےکہ مالدیپ آنے والے شہری مقامی حکام کے مقرر کردہ ضوابط کی پابندی کریں۔ 

اخبار 24 کے مطابق سفارتخانے نے بیان میں کہا کہ مالدیپ کے  حکام نے سیاحت کے لیے آنے والوں کے لیے روانگی سے قبل 72 گھنٹے  کے اندر پی سی آر ٹیسٹ کی نیگٹیو رپورٹ کی پابندی لگائی ہے اس سے ایک برس کے بچے مستثنی ہوں گے, 

 مالدیپ کے حکام کا کہنا ہے کہ پہنچنے سے قبل  48 گھنٹے کے اندر ویب سائٹ پر موجود اقرار نامہ جمع کرائیں۔ واپسی کا ٹکٹ اورہوٹل میں بکنگ کا ثبوت بھی دیاجائے۔

سفارتخانے نے بتایا کہ مملکت میں منظور شدہ ویکسین کی خوراکوں کا ریکارڈ اپنے ہمراہ رکھیں۔ مالدیپ کے بعض اداروں میں داخلے کے لیے ویکسین یافتہ ہونا ضروری ہے۔ آباد جزیروں میں قیام کے دوران وہاں آنے جانے کی ہدایات کی پابندی کی جائے۔  بعض جزیروں کے حکام آمد ورفت کے لیے پی سی آر ٹیسٹ ضروری قرار دیے ہوئے ہیں۔ 

مملکت واپسی کے وقت ایئرلائن سے معلوم کیا جائے کہ کیا مالدیپ سے نکلنے کے لیے پی سی آر ٹیسٹ ضروری ہے یا نہیں۔ سفرکے لیے دیگر پابندیوں کی بابت بھی ایئرلائن سے رابطہ کیا جائے۔  

اندرون ملک فضائی اور بحری سفر کے دوران کورونا ایس او پیز کی پابندی کی جائے۔ 

مالدیپ میں قیام کے دوران کورونا وائرس میں مبتلا ہوجانے پر7 دن کے لیے قرنطینہ کیا جاتا ہے اور اس کے اخراجات سیاح کو ادا کرنا ہوتے ہیں۔