راولپنڈی ٹیسٹ: آسٹریلیا کے بغیر کسی نقصان کے 5 رنز

راولپنڈی میں جاری پہلے ٹیسٹ میچ کے دوسرے روز کھیل کے اختتام تک آسٹریلیا نے پہلی اننگز میں بغیر کسی نقصان کے پانچ رنز بنائے ہیں۔

کم روشنی کے باعث جب دوسرے دن کا کھیل 16 اوورز قبل ختم کیا گیا تو اس وقت عثمان خواجہ چار جبکہ ڈیوڈ وارنر صفر پر بیٹنگ کررہے تھے۔ 

اس سے قبل پاکستان نے آسٹریلیا کے خلاف چار وکٹوں کے نقصان پر 476 رنز بنانے کے بعد اپنی پہلی اننگز ڈیکلیئر کردی تھی۔

سنیچر کو کھیل کے دوسرے روز اظہر علی 185 رنز بنانے کے بعد آؤٹ ہوئے تو یہ پاکستان کے لیے چوتھی وکٹ کا نقصان تھا۔ وکٹ کیپر بیٹسمین محمد رضوان 29 اور افتخار احمد 13 رنز کے ساتھ ناٹ آؤٹ رہے۔

قبل ازیں 414 کے مجموعی سکور پر پاکستان کی تیسری وکٹ گری تھی جب بابراعظم 36 رنز بنانے کے بعد آؤٹ ہوئے تھے۔

راولپنڈی ٹیسٹ کے دوسرے دن پاکستان کو امام الحق کی صورت پہلی وکٹ کا نقصان ہوا جب اوپنر بلے باز 157 رنز بنا کر پیٹ کمنز کی گیند پر آؤٹ ہوئے تھے۔

جمعے کو پاکستان نے ٹاس جیت کر پہلے بیٹنگ کا فیصلہ کیا تھا اور دن کے اختتام پر ایک وکٹ کے نقصان پر 245 رنز بنائy تھے۔

کھیل شروع ہونے سے قبل جمعے کو انتقال کر جانے والے آسٹریلوی سپن بولر شین وارن کی یاد میں ایک منٹ کی خاموشی اختیار کی گئی۔

پاکستان کرکٹ بورڈ نے سنیچر کو میچ سے قبل ٹوئٹر پر آسٹریلوی کپتان پیٹ کمنز کی ویڈیو شیئر کی۔

آسٹریلوی کپتان پیٹ کمنز کا کہنا تھا کہ وکٹیں جلد حاصل کرنے کی کوشش کریں گے۔

میچ کی حکمت عملی کے حوالے سے پوچھے گئے سوال پر ان کا کہنا تھا کہ اس وقت پاکستان کے ساتھ کھیلے جانے والے ٹیسٹ میچ کا سکور بورڈ غیر متوازن ہے اس لیے ہماری کوشش ہو گی کہ وکٹیں حاصل کریں۔

انہوں نے شین وارن کے انتقال کا ذکر کرتے ہوئے کہا کہ ’یہ ایک مشکل وقت ہے۔‘

انہوں نے شین وارن کو یاد کرتے ہوئے کہا کہ میں چھوٹا تھا جب وہ کھیلتے تھے اور ان کو دیکھتا تھا۔

’میں جب کرکٹ میں آیا تو انہوں نے مدد کی اور سراہا، ان سے بہت کچھ سیکھنے کو ملا۔‘

پاکستان کی جانب سے جمعے کو امام الحق نے بہترین کھیل پیش کرتے ہوئے 132 رنز بنائے۔ انہوں نے 14 چوکوں اور دو چھکوں کی مدد سے اپنی سنچری مکمل کی تھی۔

پہلے دن کا کھیل ختم ہوا تو امام الحق 132 اور اظہر علی 64 رنز بناکر کریز پر موجود تھے۔ پاکستان کی پہلی وکٹ عبداللہ شفیق کی گری جو 44 رنز پر کیچ آؤٹ ہوگئے۔

جمعے کو میچ شروع ہونے سے پہلے پاکستان کرکٹ ٹیم کے کپتان بابر اعظم کا کہنا تھا کہ ’اچھی کرکٹ کھیلنے کی کوشش کریں گے، وکٹ اچھی لگ رہی ہے آخری دنوں میں سپنرز کے لیے سازگار ہوسکتی ہے۔‘

ٹیسٹ کے لیے پاکستان کی ٹیم میں کپتان بابر اعظم کے علاوہ امام الحق، عبداللہ شفیق، اظہر علی، فواد عالم، افتخار احمد، محمد رضوان، نعمان علی، ساجد خان، شاہین شاہ آفریدی اور نسیم شاہ شامل ہیں۔

دوسری جانب آسٹریلیا کی ٹیم میں کپتان پیٹر کمنز، عثمان خواجہ، ڈیوڈ وارنر، مارنس لامبوشین، سٹیون سمتھ، ٹریوس ہیڈ، کیمرون گرین، الیکس کیری، مچل سٹارک، ناتھن لائن اور جوش ہیزل وڈ شامل ہیں۔

راولپنڈی سٹیڈیم میں کرکٹ آسٹریلیا اور آئی سی سی کے عہدیداروں کے ہمراہ پریس کانفرنس کرتے ہوئے پاکستان کرکٹ بورڈ کے چیف ایگزیکٹیو فیصل حسنین نے میچ کو پاکستان کی کرکٹ کا اہم دن قرار دیا تھا۔

کرکٹ آسٹریلیا کے چیف ایگزیکٹیو نک ہاکلے کا کہنا تھا کہ’پاکستان میں آج تاریخی دن ہے جس کے لیے ہم نے انتھک کام کیا ہے۔ پی سی بی اور پاکستان میں کرکٹ کے مداحوں کا شکریہ ادا کرتا ہوں۔‘