وائٹ ہاؤس نے کہا ہے کہ امریکی صدر جو بائیڈن نے مائیکل ریٹنی کو سعودی عرب میں نیا سفیر نامزد کیا ہے۔
عاجل ویب سائٹ کے مطابق امریکی سفارتکار مائیکل ریٹنی عراق، لبنان، مراکش، قطر اور اسرائیل میں سفارتی خدمات انجام دے چکے ہیں۔ ان کا شمار تجربہ کار سفارت کاروں میں ہوتا ہے۔
مائیکل ریٹنی بوسٹن یونیورسٹی سے گریجویٹ ہیں۔ انہوں نے جارج واشنگٹن یونیورسٹی سے ایم فل کی ڈگری حاصل کی۔
اس وقت وہ معاون نائب وزیر خارجہ برائے عالمی ابلاغ کے عہدے پر فائز ہیں۔ اس سے قبل وہ وزارت خارجہ میں امور مشرق قریب کے ترجمان رہ چکے ہیں۔
مائیکل ریٹنی نے 1990 میں سفارتکار کی حیثیت سے اپنے کیریئر کا آغاز کیا تھا۔ قطر میں امریکی سفارتخانے میں سفارتی مشن کے نائب کے طور پر فرائض انجام دیے ۔ میکسیکو سٹی، بغداد، بیروت، کاسابلانکا، برج ٹاؤن اور واشنگٹن میں متعدد سفارتی عہدوں پر کام کرچکے ہیں۔
انہوں نے 2012 کے دوران القدس میں امریکی قونصلر کے طور پر بھی خدمات انجام دی ہیں۔
