جمیکا ... پاکستان اور ویسٹ انڈیز کے درمیان 3میچز پرمشتمل سیریزکا پہلا ٹیسٹ 21اپریل سے جمیکا میں شروع ہوگا۔ پاکستانی کرکٹ ٹیم نے جمیکا میں ٹور میچ سے قبل 3گھنٹے کے پریکٹس سیشن میں صلاحیتوں کونکھارنے کے لئے محنت کی ۔ احمد شہزاد، حسن علی اور محمد عامر نے آرام کیا۔ کپتان مصباح الحق او ر ریٹائرمنٹ کا اعلان کرنے والے دوسرے سینئر بیٹسمین یونس خان، اظہر علی، بابر اعظم، اسد شفیق، سرفراز احمد، عثمان صلاح الدین، یاسر شاہ، شاداب خان، محمد اصغر، وہاب ریاض اور محمد عباس میدان میں موجود تھے۔کھلاڑیوں نے وارم اپ کے بعد پش اپس سمیت مختلف مشقوں کے بعد فیلڈنگ کوچ اسٹیورکسن کی رہنمائی میں ڈرلز کرتے ہوئے کارکردگی بہتر بنائی۔ سلپ میں مشکل کیچز لینے کی خاص طور پر پریکٹس کرائی گئی۔ نیٹ میں بیٹسمین اسپنرز کی گھومتی گیندوں پر اپنی تکنیک بہتر بنانے کیلئے کام کرتے رہے۔عثمان صلاح الدین اور اسد شفیق نے طویل سیشن کیا۔واضح رہے کہ پاکستان ٹیم ویسٹ انڈیزکی سرزمین پرآج تک طویل فارمیٹ میں کوئی سیریزنہیں جیت سکی۔ گزشتہ 7 میں سے4 سیریز میں میزبان ٹیم فاتح رہی جبکہ 3ڈرا ہوئیں۔
