کامن ویلتھ گیمز: پاکستانی ریسلرز انعام بٹ اور زمان انور ریسلنگ کے فائنل مقابلوں میں

دولت مشترکہ کھیلوں میں پاکستانی ریسلرز نے اپنے اہم میچز میں کامیابی حاصل کر کے فائنل مرحلے کے لیے کوالیفائی کر لیا ہے۔

جمعہ کو ہونے والے مقابلوں میں مین فری سٹائل کی 65 کلوگرام کیٹیگری میں عنایت اللہ نے مدمقابل کھلاڑی کو ہرا کر اگلے مرحلے کے لیے کوالیفائی کیا۔

دو منٹ سے زائد جاری رہنے والے مقابلے میں عنایت اللہ نے مخالف کھلاڑی کو کوئی بھی پوائنٹ حاصل نہ کرنے دیا اور 10 صفر سے کامیابی حاصل کی۔

عنایت اللہ کو سیمی فائنل میں کینیڈین ریسلر لچلن مک نیل سے شکست ہوئی۔ اب وہ کانسی کے تمغے کے لیے سکاٹ لینڈ کے روس کونیلی سے مقابلہ کریں گے۔

پاکستانی کھلاڑی انعام بٹ نے 86 کلوگرام کیٹیگری میں اپنے اہم میچوں میں کامیابی حاصل کر کے فائنل کے لیے کوالیفائی کیا۔ انہوں نے آسٹریلوی جیڈن لارنس اور جنوبی افریقی کھلاڑی ایڈورڈ لیسنگ کو شکست دی۔

فائنل میں ان کا سامنا انڈین حریف دیپک پونیا سے ہوگا۔

ریسلنگ مقابلوں میں انعام بٹ اب تک پاکستان کے لیے پانچ مرتبہ عالمی ٹائٹل جیت چکے ہیں۔ دولت مشترکہ کھیلوں میں دو مرتبہ گولڈ اور دو مرتبہ برونز میڈیل حاصل کر چکے ہیں۔

تیسرے پاکستانی ریسلر زمان انور نے بھی اپنے میچ میں کامیابی حاصل کر کے اگلے مرحلے کے لیے کوالیفائی کر لیا ہے۔ اب وہ فائنل مقابلے میں میڈل کے لیے میدان میں اتریں گے۔

125کلوگرام کیٹیگری کے مقابلے میں پاکستانی ریسلر زمان انور نے انگلینڈ کے مندھیر کونر کو شکست دی۔