الباحہ میں عہد رفتہ کی یادیں تازہ کرنے کے لیے خصوصی میلہ

الباحہ کمشنری کے قدیم روایتی بازار ’الاطاولہ‘ میں عہد رفتہ کی یادوں کو تازہ کرنے کے لیے چھٹے میلے کا انعقاد کیا گیا ہے۔ میلے میں زمانہ قدیم کی اشیا، ملبوسات اور طرز زندگی کو اجاگرکیا جا رہا ہے۔

سعودی خبررساں ایجنسی ’ایس پی اے‘ کے مطابق الباحہ ریجن میں علاقے کی قدیم روایات کو زندہ رکھنے اور نسل نو کو اس سے متعارف کرانے کے لیے خصوصی ثقافتی میلے کا اہتمام کیا گیا ہے۔

میلے کی انتظامیہ نے پتھروں کے گھر کا ماڈل بھی نمائش گاہ میں بنایا ہے جبکہ زمانہ قدیم میں استعمال ہونے والی پتھرکی چکی سے آٹا پیسنے کی منظرکشی بھی کی جا رہی ہے۔

علاقے کی ثقافت کو اجاگرکرنے کے لیے پرانے طرز کے کپڑوں اور آرائشی اشیا کو بھی نمایاں انداز میں پیش کیا گیا ہے۔

منتظمین نے عہد رفتہ میں کاشتکاری کے طریقوں کو اجاگرکرنے کے لیے بیلوں اورکھیت کا بھی بندوبست کیا ہے اور کھیت میں ہل چلاتے ہوئے دکھایا جاتا ہے۔

نمائش میں روایتی سٹیج شو اورمختلف کھیلوں کا بھی بندوبست کیا گیا ہے جبکہ علاقے کی روایتی اشیا کی ترویج کے لیے بھی خصوصی سٹالز لگائے گئے ہیں جبکہ روایتی قہوہ خانے اور قدیم طرز کی دکانیں بھی شائقین کے لیے خصوصی دلچسپی کا سامان مہیا کررہی ہیں۔