شاہ رخ خان کا معذور مداح کے ساتھ ڈانس

بالی وڈ کے بادشاہ شاہ رخ خان کی اپنی معذور مداح کے ساتھ مشہور گانے ’چل چھیا چھیا‘ گانے پر ڈانس کی ویڈیو سماجی رابطوں کی ویب سائٹ ٹوئٹر پر ایک بار پھر وائرل ہو گئی ہے۔

ویڈیو میں دیکھا جا سکتا ہے کہ شاہ رخ خان وِیل چیئر پر بیٹھی اپنی معذور مداح کے سامنے 1998 میں ریلیز ہونے والی فلم ’دل سے‘ کے شہرہ آفاق گانے ’چل چھیا چھیا‘ پر ڈانس کر رہے ہیں اور وہ بھی ان کا ساتھ دے رہی ہیں۔

سنہ 1998 میں ریلیز ہونے والے اس گانے کا سحر آج بھی ویسے ہی برقرار ہے۔

یہ گانا شاہ رخ خان کے پسندیدہ ترین گانوں میں سے ایک ہے اور اکثر وہ اس پر جھوم اٹھتے ہیں۔

شاہ رخ خان کی اپنی معذور مداح کے ساتھ ڈانس کی ویڈیو پر ٹوئٹر صارفین بھی تبصرے کر رہے ہیں۔

فاطمہ ضرار نے ٹویٹ کیا کہ ’میں یہ کِلپ ہزار مرتبہ دیکھ چکی ہوں، لیکن پھر بھی شاندار لگتا ہے۔‘

پربھا شالیم نے لکھا کہ ’یہ بہت عاجز ہیں، شاید اسی وجہ سے یہ دنیا کے پہلے اتنے مشہور سٹار ہیں۔‘

ماروشکا کا کہنا تھا کہ ’اس ویڈیو کو دیکھ کر آپ کے آنسو نکل آئیں گے، عاجز انسان، صرف اور صرف شاہ رخ خان۔‘

دوسری جانب شاہ رخ خان نے جمعرات کو اپنے سوشل میڈیا اکاؤنٹس پر اپنی آنے والی فلم ’پٹھان‘ میں شامل مرکزی کردار جون ابراہام کی بھی تصاویر جاری کی ہیں۔

’پٹھان‘ میں کنگ خان کے ساتھ دیپیکا پڈوکون اور جون ابراہام شامل ہیں۔

واضح رہے شاہ رخ خان پانچ سال کے وقفے کے بعد 2023 میں بڑی سکرین پر واپس آ رہے ہیں۔ ان کی تین فلمیں ایک ہی سال میں ریلیز ہو گی۔

اس سے پہلے سنہ 2003 میں شاہ رخ خان کی ایک سال میں تین فلمیں ریلیز ہوئی تھیں جس میں ’سوادیس‘، ’ویر زارا‘ اور ’میں ہوں نا‘ شامل تھیں۔

شاہ رخ خان کی 2023 میں ریلیز ہونے والی پہلی فلم ’پٹھان‘ ہو گی جو سدھارتھ آنند کی ہدایت کاری میں بنائی گئی ہے۔

اس کے بعد ایٹلی کمار کی ہدایت کاری میں بننے والی فلم ’جوان‘ ریلیز کی ہو گی۔ جبکہ سب سے آخر میں راج کمار ہرانی کے ساتھ شاہ رخ خان کی فلم ’ڈنکی‘ ریلیز کی جائے گی۔