’انڈیا میچ جیتنے کے لیے فیورٹ‘، میچ سے قبل بنگلہ دیشی کپتان کا بیان

بنگلہ دیش کے کپتان شکیب الحسن نے کہا ہے کہ ان کی ٹیم اور انڈیا کے درمیان ہونے والا میچ جیتنے کے لیے انڈیا کی ٹیم فیورٹ ہے۔

کرکٹ کی ویب سائٹ ای ایس پی این کرک انفو کے مطابق منگل کو بنگلہ دیش کے کپتان شکیب الحسن کا کہنا تھا کہ ’میچ میں جانے سے پہلے انڈیا جیتنے کے لیے فیورٹ ہیں۔‘

انہوں نے انڈیا کی ٹیم کے حوالے سے مزید کہا کہ ’وہ (انڈینز) یہاں ورلڈ کپ جیتنے آئے ہیں۔ ہم (بنگلہ دیش) یہاں ورلڈ کپ جیتنے نہیں آئے۔‘

خیال رہے کہ انڈیا اور بنگلہ دیش کے درمیان یہ میچ 2 نومبر بروز بدھ کھیلا جائے گا اور یہ میچ پاکستان کے لیے بھی انتہائی اہم ہے۔ اگر بنگلہ دیش انڈیا کو ہرانے میں کامیاب ہوجاتا ہے اور پاکستان جنوبی افریقہ اور بنگلہ دیش کے خلاف اپنے میچ جیت جاتا ہے تو گرین شرٹس سیمی فائنل تک رسائی حاصل کرسکتے ہیں۔

بنگلہ دیش اور انڈیا کے درمیان میچ پر مزید بات کرتے ہوئے شکیب الحسن کا کہنا تھا کہ ’اگر ہم انڈیا کے خلاف جیت جاتے ہیں تو یہ ایک اپ سیٹ ہوگا اور ہم انڈیا کو اپ سیٹ کرنے کی پوری کوشش کریں گے۔‘

ٹورنامنٹ میں پاکستان کا اگلا میچ جنوبی افریقہ سے 3 نومبر کو ہوگا جبکہ گرین شرٹس کا مقابلہ بنگلہ دیش سے 6 نومبر کو ہوگا۔