’یہ سپنر تھے یا بیٹسمین؟‘ شاہد آفریدی کا سابق انڈین کھلاڑی پر طنز

پاکستانی کرکٹ ٹیم کا آسٹریلیا میں جاری ٹی20 ورلڈ کپ میں آگے کا سفر مشکلات سے بھرپور ہے اور اس بات کی بھی کوئی گارنٹی نہیں کہ پاکستان اپنے اگلے دونوں میچ جیت کر ٹورنامنٹ کے سیمی فائنل میں پہنچ جائے گا۔

پاکستان کو نہ صرف جنوبی افریقہ اور بنگلہ دیش کے خلاف اپنے میچ جیتنے ہیں بلکہ دیگر ٹیموں کی ہار جیت بھی پاکستان کے سیمی فائنل میں پہنچنے یا نہ پہنچنے کا فیصلہ کرے گی۔

پاکستان ٹیم کی کارکردگی اس وقت سوشل میڈیا پر موضوع گفتگو بنی ہوئی ہے۔ پاکستان کے کپتان بابر اعظم بھی ٹی 20 ورلڈ کپ کے تین میچوں میں صرف آٹھ رنز بنا سکے ہیں۔

ان کی اس کارکردگی پر سابق انڈین کھلاڑی امت مشرا نے بھی ٹویٹ کیا۔ انہوں نے بابر اعظم کو مخاطب کرتے ہوئے لکھا کہ ’یہ وقت بھی گزر جائے گا۔ آپ مضبوط رہیے۔‘

امت مشرا اکثر پاکستانی ٹیم اور کھلاڑیوں پر طنزیہ تبصرے کرتے رہتے ہیں اس لیے یہ جاننا تھوڑا مشکل ہے کہ وہ اس وقت سنجیدہ تھے یا نہیں۔

ان کی اس ٹویٹ سے متعلق ایک سوال پاکستان کے سابق کپتان شاہد آفریدی سے بھی کیا گیا۔ پاکستانی چینل سما ٹی وی پر اس سوال کا جواب دیتے ہوئے انہوں نے کہا ’یہ جو آپ نام لے رہے ہیں یہ بھی انڈیا سے کھیلے ہوئے ہیں؟‘

انہوں نے امت مشرا پر طنز کرتے ہوئے کہا ’یہ سپنر تھا یا بیٹسمین؟‘