27 ممالک کے فوجیوں میں بین الاقوامی حفظ قرآن مقابلے کا آغاز

سعودی ولی عہد و وزیراعظم شہزادہ محمد بن سلمان کی سرپرستی میں اتوار کو وزارت دفاع کے زیراہتمام  فوجیوں کے درمیان حفظ قرآن کے نویں بین الاقوامی مقابلے کا آغاز مکہ مکرمہ میں ہوا اور یہ 13 نومبر تک جاری رہے گا۔ 

وزیر دفاع شہزادہ خالد بن سلمان کی نیابت کرتے ہوئے ڈاکٹر محمد العیسی نے مقابلے کا افتتاح  کیا ہے۔ اس موقع پر وزارت دفاع کے ماتحت ہونے والے مقابلے کے نگراں اعلٰی عبدالرحمان الحسینی بھی موجود تھے۔

سعودی خبررساں ادارے ایس پی اے کے مطابق ڈاکٹر محمد العیسٰی نے مقابلے کے شرکا کا خیرمقدم کیا۔ 

مقابلے کے نگراں اعلٰی عبدالرحمان الحسینی نے افتتاحی تقریب سے خطاب کرتے ہوئے کہا کہ ’سعودی عرب قرآن کریم اور اس کے حفظ کے حوالے سے اہم خدمات انجام دے رہا ہے اور قرآن و سنت ہی ملک کا آئین ہیںَ‘

فوجیوں کے درمیان حفظ قرآن کے بین الاقوامی مقابلے میں 27 سے زیادہ ممالک کے امیدوار حصہ لیا۔ افتتاحی اجلاس کے بعد ججوں کی کمیٹی نے متعدد امیدواروں سے قرآن کریم کی تلاوت سنی۔

یاد رہے کہ حفظ قرآن کے مقابلے کی کارروائی صبح آٹھ سے دوپہر 12 اور پھر سہ پہر چار سے ساڑھے پانچ بجے تک ہو رہی ہے۔ وقفے کے دوران قرآن کریم اور اس کے علوم کے حوالے سے پروگرام بھی کیے جا رہے ہیں۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں