تحریک انصاف کے احتجاج کے باعث راولپنڈی میں کون سے راستے بند ہیں؟

سابق وزیراعظم عمران خان پر حملے کے خلاف اسلام آباد کے جڑواں شہر راولپنڈی میں مری روڈ سمیت مختلف مقامات پر تحریک انصاف کا احتجاج تیسرے روز میں داخل ہو گیا ہے۔

ان مظاہروں کی وجہ سے اسلام آباد کی طرف آنے اور اسلام آباد سے جانے والی شاہراہیں مکمل طور پر بند ہیں۔

مری روڈ، پیرودھائی موڑ، گلزار قائد، اولڈ ایئرپورٹ روڈ، سرائے کال چوک ٹیکسلا، رتہ شاہ چوک مارگلہ، موٹر وے ایم ٹو، اسلام آباد لاہور ٹول پلازہ کے قریب سے بند کیے گئے ہیں۔

مظاہرین نے سواں پل ایس او ایس ویلج کے قریب بھی راولپنڈی  کی طرف جانے والے راستے کو بند کر رکھا ہے جبکہ ٹریفک کو سڑک کے ایک جانب سے گزارا جا رہا ہے۔ سڑکیں اور راستے بند ہونے کے باعث مری میں ٹریفک  کا نظام آج تیسرے روز بھی شدید متاثر ہے۔

پی ٹی آئی کی جانب سے جہاں جہاں بھی احتجاج کیا جا رہا ہے وہاں چند کارکنان موجود ہیں جنھوں نے رکاوٹیں لگا کر راستے بند کر رکھے ہیں۔

یوم اقبال کی عام تعطیل کے باعث تعلیمی ادارے اور سرکاری و نجی دفاتر بند ہیں تاہم روز مرہ کے معمولات زندگی کے لیے جڑواں شہروں میں آمد و رفت کے لیے شہریوں کو شدید پریشانی کا سامنا کرنا پڑ رہا ہے۔ مری روڈ سے سفر کرنے والے سروس روڈ اور گلیوں سے گزرنے پر مجبور ہیں۔

دوسری جانب جی ٹی روڈ سواں پل کے قریب پی ٹی آئی کے دھرنے کے باعث مال بردار گاڑیوں کی طویل قطاریں لگ گئیں جس سے مسافر گاڑیوں سمیت دیگر ٹریفک بھی جام ہوگیا۔

اس احتجاج کے باعث راولپنڈی میں ٹریفک کا نظام متاثر ہے تاہم وفاقی دارالحکومت اسلام آباد کی تمام شاہراہیں ٹریفک کے لیے کھلی ہیں۔ چند مقامات پر ٹریفک کی روانی بحال رکھنے کے لیے متبادل راستوں پر ٹریفک کو منتقل کیا جا رہا ہے۔