ٹانک: شادی میں بن بلائے مہمانوں پر پابندی عائد، جرگے کا فیصلہ

شادی بیاہ کی تقریبات بالخصوص دیہات میں کچھ لوگ پرائی شادی میں بن بلائے دعوت اڑانے چلے آتے ہیں، ایسے ہی مہمانوں سے پریشان شہریوں نے اس مسئلے کا حل نکالنے کے لیے جرگہ بٹھا دیا۔

گزشتہ روز ایسا ہی ایک جرگہ صوبہ خیبرپختونخوا کے ضلع ٹانک کے ایک گاؤں میں منعقد ہوا جس نے بن بلائے مہمانوں کے مسئلے پر اپنا فیصلہ سنایا۔

اردو نیوز کا فیس پیج لائک کریں

ضلع ٹانک کے مرتضیٰ نامی گاؤں میں آباد میانی قوم کے اس جرگے میں گاؤں کے دیگر عمائدین بھی شامل تھے۔

 قبیلے نے گاؤں کے دیگر عمائدین کی مشاورت کے ساتھ فیصلہ کیا کہ آئندہ کسی بھی شادی، بیاہ یا خوشی کی تقریب میں بن بلائے مہمان نہیں شامل ہوں گے اور نہ ہی زبردستی شامل ہونے والے شخص کو کھانا کھانے کی اجازت ہوگی۔ 

گاؤں کے رہائشی راجہ خان نے اردو نیوز سے بات کرتے ہوئے بتایا کہ ولیمے کی تقریب میں اکثر لوگ بغیر دعوت کے کھانا کھانے کی لالچ میں شریک ہو جاتے ہیں جس کی وجہ سے مدعو کیے گئے مہمانوں کے لیے کھانا کم پڑجاتا ہے جس سے میزبان کو شرمندگی کا سامنا کرنا پڑتا ہے۔

راجہ خان کے مطابق مہنگائی کی وجہ سے پہلے ہی شادی پر خرچہ بہت آتا ہے اور ان بن بلائے مہمانوں کی وجہ سے خرچہ دگنا ہو جاتا ہے۔

گاؤں کے عمائدین کی جانب سے ایک ویڈیو بھی سوشل میڈیا پر شئیر کی گئی ہے جس میں انہوں نے شہریوں سے اس فیصلے پر عمل کرنے کی اپیل کی ہے۔

مقامی صحافی عصمت شاہ گروکی نے جرگے کے اس فیصلے کو خوش آئند قرار دیتے ہوئے کہا کہ گاؤں میں شادی کے کھانوں پر لوگوں کی ایک بڑی تعداد آتی ہے جس پر چار سے پانچ لاکھ روپے خرچ ہوتے ہیں مگر مہمانوں سے زیادہ تعداد ان لوگوں کی ہوتی ہے جن کا نام دعوت نامے پر موجود ہی نہیں ہوتا۔

 ’ایسے لوگوں میں اکثریت مسافر یا ڈرائیور حضرات کی ہوتی ہے اور بعض اوقات تو دور دراز گاؤں سے لوگ کھانے کے لیے پہنچ جاتے ہیں۔‘

اردو نیوز کا یوٹیوب چینک سبسکرائب کریں

بن بلائے مہمانوں کا مسئلہ حال ہی میں ایک شادی کی تقریب کے بعد اٹھایا گیا جس کے بعد گاؤں کے معززین یہ فیصلہ کرنے پر مجبور ہوئے۔

عصمت شاہ کے مطابق ویسے تو لوگ مہمان نوازی کر کے خوش ہوتے ہیں مگر شادی بیاہ کی تقریب میں صرف مدعو کیے گئے لوگوں کے لیے کھانا تیار ہوتا ہے۔