’کچھ مختلف کرنے کا وقت‘ انجلینا جولی نے اقوام متحدہ کو چھوڑ دیا

مشہور بالی وڈ اداکارہ انجلینا جولی اقوام متحدہ کے ادارہ برائے مہاجرین سے الگ ہو گئی ہیں، وہ 20 سال سے زائد ادارے کے لیے بطور نمائندہ خصوصی خدمات انجام دیتی رہیں۔

ایسوسی ایٹڈ پریس کے مطابق جمعے کو اقوام متحدہ اور اداکارہ کی جانب سے مشترکہ بیان جاری کیا گیا جس میں کہا گیا تھا ’اداکارہ اپنے عہدے سے ایک قدم آگے بڑھتے ہوئے وسیع پیمانے پر انسانی حقوق سے متعلق ایشوز پر کام کرنے جا رہی ہیں۔‘  

بیان میں انجلینا جولی کی جانب سے کہا گیا ہے کہ ’میں دنیا بھر میں کہیں بھی موجود پناہ گزینوں، مہاجرین اور بے گھر افراد کے لیے جتنا ہو سکا کام جاری رکھوں گی۔‘

انہوں نے عہدہ چھوڑنے کی وجہ بتاتے ہوئے کہا کہ ’یہ وقت ہے کچھ مختلف انداز میں کام کرنے کا، جس کے لیے براہ راست پناہ گزینوں اور ان کے لیے کام کرنے والے مقامی امدادی اداروں سے رابطہ کروں گی۔‘

انجلینا جولی نے اقوام متحدہ کے ساتھ 2001 میں کام شروع کیا تھا اور 2012 میں ان کو نمائندہ خصوصی کا عہدہ دیا گیا تھا۔

بیان میں انجلینا جولی کو نمایاں خدمات پر خراج تحسین پیش کیا گیا ہے۔

اقوام متحدہ کے ہائی کمشنر برائے مہاجرین فیلپ گریندی کا کہنا ہے کہ ’یو این ایچ سی آر کے ساتھ کامیاب اور طویل عرصہ گزارنے پر میں انجلینا جولی کے اس فیصلے حمایت کرتا ہوں اور سراہتا ہوں وہ لوگوں کی مدد کے طریقہ کار میں قدرے تبدیلی لا رہی ہیں۔‘

ان کے مطابق ’میں جانتا ہوں کہ پناہ گزینوں کی مدد کا جذبہ ان کے دل کے قریب رہے گا اور مجھے یقین ہے کہ اب وہ اسی جذبے کے ساتھ وسیع پیمانے پر کام کریں گی۔‘

گزشتہ ماہ گارڈین میں شائع ہونے والے اپنے ایک بلاگ میں انجلینا جولی نے عالمی سطح پر جنسی تشدد کے خاتمے کے لیے پیش رفت نہ ہونے پر مایوسی کا اظہار کیا تھا۔

ان کا کہنا تھا کہ ’ہم نے ان خوفناک چیزوں پر بات چیت کرتے ہیں اور اتفاق کرتے ہیں کہ ان کو دوبارہ ہونے سے روکا جائے گا۔ ہم نے عہد کیا ہے کہ اب واضح لائن کھینچی جائے، لیکن جب یہ مشکل سوال سامنے آتا ہے کہ اس عہد پر عملدرآمد کیسے ہو گا تب ہم پھر اسی بحث میں پڑ جاتے ہیں۔‘

انہوں نے خصوصی طور پر اقوام متحدہ کی سلامتی کونسل کے اراکین سے ’ویٹو پاور کا غلط استعمال‘ روکنے کا مطالبہ بھی کیا تھا۔

اداکارہ نے اس سے قبل 2017 میں جنیوا میں ایک تقریر کے دوران اقوام متحدہ کو ’نامکمل‘ قرار دیا تھا لیکن ساتھ ہی ادارے کا دفاع کرتے ہوئے کہا تھا کہ اس کی حمایت ضروری ہے۔‘