’السلام علیکم جی، کیسے ہیں آپ‘، مریم نواز کی پاکستان واپسی

پاکستان کی حکمراں جماعت مسلم لیگ ن کی سینیئر نائب صدر اور چیف آرگنائزر مریم نواز نے کہا ہے کہ نواز شریف آنے والے دنوں میں پاکستان آئیں گے۔

سنیچر کو لاہور میں جلسے سے خطاب کرتے ہوئے مریم نواز نے کہا ہے کہ جب تک قوم کو مشکلات سے نہیں نکالیں گے آرام سے نہیں بیٹھیں گے۔

انہوں نے کہا کہ عنقریب سابق وزیراعظم نواز شریف پاکستان آئیں گے۔

مریم نواز نے کہا کہ ’آٹھ مہینے کا حساب بعد میں ہو گا، پہلے گزشتہ پانچ سال کا حساب ہو گا۔‘

انہوں نے کہا ’تین بار ملک کو مشکل سے نکالنے والا نواز شریف ترقی کا پہیہ دوبارہ رواں کرے گا۔‘

مریم نواز کا کہنا تھا کہ ’اسحاق ڈار پر یقین رکھو اور اللہ پر بھروسہ رکھو، ان شاء اللہ معیشت کو درست ٹریک پر لائیں گے۔‘

ان کا کہنا تھا کہ وہ یکم فروری سے ہر ضلعے کا دورہ کریں گی۔

مریم نواز ایک طویل عرصے کے بعد لندن سے پاکستان پہنچی ہیں تو ان کے استقبال کی تیاریاں اور سفر کی تفصیل سوشل ٹائم لائنز کا موضوع بنی رہی۔

مریم نواز شریف نے سنیچر کی سہ پہر لاہور پہنچتے ہی اپنی مختصر ٹویٹ میں قومی ترانے کا بول ’پاک سر زمین شاد باد‘ لکھا۔

غیرملکی ایئرلائن کے ذریعے لندن سے متحدہ عرب امارات اور وہاں سے پی آئی اے کے ذریعے لاہور پہنچنے کے سفر میں مریم نواز کا جہاز تاخیر کا شکار ہوا تو ان کی سیاسی مخالف پی ٹی آئی کے ایک رہنما نے دعوی کیا کہ ’لاہور میں استقبال کرنے والوں کی کم تعداد کی وجہ سے جہاز لیٹ کیا گیا ہے۔‘

سابق وزیراعظم عمران خان کے مشیر اور پی ٹی آئی رہنما مزمل اسلم نے لاہور ایئرپورٹ کے باہر کھڑی گاڑیوں کی ایک ویڈیو شیئر کرتے ہوئے استقبالیہ ہجوم کی تعداد پر بھی طنز کیا۔

سیاسی مخالفین کی جانب سے ’لوگ کم ہونے‘ کے دعوے کے جواب میں مسلم لیگ ن نے اپنی رہنما کو ’امید سحر‘ قرار دیا تو ویڈیو ٹویٹ کرتے ہوئے بتایا کہ ’لیگی کارکنان کی کثیر تعداد مریم نواز شریف کے استقبال کے لیے لاہور ایئرپورٹ پر موجود ہے۔‘

مریم نواز کو پاکستان لانے والی فلائٹ تاخیر کا شکار ہوئی تو لاہور میں ان کے استقبال اور کارکنان سے خطاب وریلی کا پروگرام بھی تبدیل کیا گیا۔

مسلم لیگ ن کی جانب سے میڈیا کو بتایا گیا کہ ’مریم نواز شریف جاتی امرا کے لیے شہر کے اندر سے نہیں جائیں گی۔ شہریوں کو ٹریفک مسائل سے بچانے کے لیے مریم نواز شریف کا روٹ تبدیل کیا گیا۔ اب وہ ائیرپورٹ سے براہ راست رنگ روڈ اڈا پلاٹ پہنچیں گی جہاں کارکنان سے خطاب کریں گی۔‘

پاکستان روانگی سے قبل گفتگو کرتے ہوئے مریم نواز کا کہنا تھا کہ ’جو ذمہ داریاں پارٹی لیڈر شپ نے مجھے سونپی ہیں میں انہیں احسن طریقہ سے ادا کروں گی۔‘

طویل عرصہ لندن میں قیام پذیر رہنے والی مریم نواز کو ان کے والد اور مسلم لیگ ن کے قائد نواز شریف کی جانب سے پارٹی کا چیف آرگنائزر مقرر کیا گیا ہے۔

مسلم لیگ ن کی جانب سے اعلان کیا گیا ہے کہ ’مریم نواز پاکستان پہنچنے کے بعد پارٹی کو نئے سرے منظم کریں گی اور ملک بھر میں ورکرز اور عوام سے رابطہ مہم شروع کی جائے گی۔‘

سابق گورنر سندھ محمد زبیر نے پارٹی رہنما کی پاکستان واپسی پر خوشی کا اطہار کیا تو ان کی آمد کو ’پارٹی کی بڑی انتخابی کامیابیوں‘ کا پیش خیمہ کہا۔

مسلم لیگ ن کے پارٹی ورکرز نے اپنی رہنما کے استقبال کے لیے سوشل ٹائم لائنز پر سرگرمی جاری رکھی تو کہا کہ ’مریم نواز کو چھ برس تک ناکردہ جرائم کی سزا دی جاتی رہی ہے لیکن وہ مضبوطی سے اپنی جگہ کھڑی رہیں۔‘