فیاض احمد -اردو نیوز، پشاور
صوبہ خیبرپختونخوا کے مختلف شہروں میں پاکستان تحریک انصاف سمیت سول سوسائٹی کے نمائندوں نے دہشت گردی کے خلاف مظاہرے کیے۔
پیر کو پشاور میں پولیس لائنز کی مسجد میں خودکش دھماکے کے بعد عوام ایک مرتبہ پھر دہشت گردی کے خلاف سڑکوں پر نکل آئے ہیں۔
جمعے کو تحریک انصاف کی جانب سے پشاور پریس کلب کے باہر احتجاجی مظاہرہ ہوا جس کو امن مظاہرے کا نام دیا گیا۔
مزید پڑھیں
پریس کلب کے باہر شرکا نے سفید جھنڈے لہراتے ہوئے امن زندہ باد اور دہشت گردی نامنظور کے نعرے لگائے۔
مظاہرین نے دہشت گردی کے واقعے میں ہلاک ہونے والے پولیس اہلکاروں کو خراج عقیدت پیش کرتے ہوئے پولیس زندہ باد کے نعرے لگائے۔
تحریک انصاف کے رہنما مراد سعید نے مظاہرے کے شرکا سے خطاب کرتے ہوئے کہا کہ ’کئی برسوں تک یہاں امن رہا اور اب دوبارہ اسی آگ میں دھکیلا جا رہا ہے۔‘
مراد سعید کا کہنا تھا کہ ’امریکی غلامی میں دوبارہ ہمارا سودا کیا جا رہا ہے لیکن ہم ایسے لوگوں کے خلاف اپنی آواز بلند کریں گے۔‘
’اگر آج پشاور میں آگ لگی ہوئی ہے تو اس کی تپش پورے ملک میں محسوس کی جائے گی۔‘
انہوں نے پشاور کے ساتھ اظہار یکجہتی میں لاہور اور کراچی سمیت تمام شہروں کے عوام سے باہر نکلنے کی اپیل کی۔
