پی ایس ایل 8: کراچی کنگز نے لاہور قلندرز کو 86 رنز سے ہرا دیا

پاکستان سپر لیگ (پی ایس ایل) کے 30 ویں اور آخری گروپ میچ میں کراچی کنگز نے لاہور قلندرز کو 86 رنز سے ہرا دیا۔

کراچی کنگز کی جانب سے دیے گئے 197 رنز کے ہدف کے جواب میں لاہور قلندرز کی پوری ٹیم 18.5 اوورز میں 110 بناکر آؤٹ ہو گئی۔

ہدف کے تعاقب میں قلندرز کا کوئی بیٹر متاثر کن کارکردگی نہ دکھا سکا۔

لاہور کی طرف سے بیٹنگ کرتے ہوئے حسین طلعت نے 25، حارث رؤف نے 18 اور فخر زمان نے 13 رنز بنائے۔

کراچی کنگز کی جانب سے عمدہ بولنگ کرتے ہوئے عماد وسیم، عاکف جاوید، محمد عمر اور عمران طاہر نے دو دو جبکہ جیمز فُلر نے ایک کھلاڑی کو آؤٹ کیا۔

اتوار کے روز قذافی سٹیڈیم لاہور میں کراچی کنگز نے ٹاس جیت کر پہلے بیٹنگ کا فیصلہ کیا۔

پہلے کھیلتے ہوئے کراچی کنگز نے نے مقررہ 20 اوورز میں 7 وکٹوں کے نقصان پر 196 رنز بنائے۔

کراچی کنگز کی جانب سے محمد اخلاق نے اپنے ڈیبیو پر 51، عماد وسیم نے 45 اور طیب طاہر نے 40 رنز سکور کیے۔

لاہور قلندرز کی جانب سے حسین طلعت، حارث رؤف اور زمان خان نے دو دو جبکہ دلبر حسین نے ایک کھلاڑی کو آؤٹ کیا۔

لاہور قلندرز اور کراچی کنگز کے درمیان یہ میچ پلے آف راؤنڈ سے پہلے رسمی کاروائی ہے کیونکہ قلندرز پہلے ہی پلے آف مرحلے کے لیے کوالئیفائی کر چکے ہیں جبکہ کنگز پی ایس ایل کے پلے آف راؤنڈ کی دوڑ سے باہر ہوچکے ہیں۔

اس میچ کے لیے لاہور قلندرز کے کپتان شاہین شاہ آفریدی کو آرام دیا گیا ہے جن کی جگہ دلبر حسین کو پلیئنگ الیون میں شامل کیا گیا ہے جبکہ شین ڈیڈز ویل نے بھی اس میچ میں اپنا پی ایس ایل ڈیبیو کیا ہے۔

شاہین آفریدی کی جگہ دفاعی چیمپیئن کی کپتانی ڈیوڈ ویزے کر رہے ہیں۔