سعودی ولی عہد 70 برس قدیم الروسا مسجد کی توسیع کرائیں گے 

سعودی ولی عہد شہزادہ محمد بن سلمان ریاض کی المجمعہ کمشنری کی الروسا مسجد کی توسیع کرائیں گے۔

سرکاری خبررساں ادارے ایس پی اے کے مطابق امیر محمد بن سلمان مملکت بھر میں تاریخی مساجد کے احیا، تجدید، توسیع اور اصلاح و مرمت کا منصوبہ نافذ کرا رہے ہیں۔

پہلے مرحلے میں 10علاقوں کی 30 مساجد پر کام مکمل کر لیا گیا ہے۔

اب دوسرے مرحلے میں 13علاقوں کی 30 مساجد کو شامل کیا گیا ہے۔ ان میں ریاض ریجن کی 6 مساجد شامل ہیں۔ الروسا مسجد ان میں سے ایک ہے۔

الروسا مسجد 70 برس قبل تعمیر کی گئی تھی۔ یہ جبل منیخ کے مغربی دامن میں واقع ہے۔ یہ نجدی طرز تعمیر پر 1365 سے 1370ھ کے دوران بنائی گئی تھی۔

امیر محمد بن سلمان اس کے رقبے میں توسیع کرائیں گے۔ اس وقت اس کا رقبہ 663 مربع میٹر ہے جو توسیع کے بعد 705 مربع میٹر ہو جائے گا۔

توسیع کے بعد نمازیوں کی گنجائش 210 تک ہو جائے گی۔ تعمیر و توسیع مقامی تعمیراتی سامان، مٹی اور گارے سے کی جائے گی۔