فوج اپنی تنصیبات کے تقدس کی مزید پامالی برداشت نہیں کرے گی: آرمی چیف

آرمی چیف جنرل عاصم منیر نے 9 مئی کو توڑ پھوڑ کرنے والے تمام منصوبہ سازوں کو کٹہرے میں لانے کا عزم ظاہر کیا ہے۔

افواج پاکستان کے شعبہ تعلقات عامہ آئی ایس پی آر کے مطابق آرمی چیف نے ان خیالات کا اظہار سنیچر کو کور ہیڈکوارٹرز پشاور کے دورے کے موقعے پر افسران سے گفتگو کرتے ہوئے کیا۔

عاصم منیر کا کہنا تھا کہ ’9 مئی کے یوم سیاہ پر متشتعل افراد، انہیں اُکسانے والوں اور ان پر عمل کرنے والوں کو انصاف کے کٹہرے میں لایا جائے گا۔‘

آرمی چیف عاصم منیر نے مزید کہا کہ ’فوج اپنی تنصیبات کے تقدس کی مزید پامالی برداشت نہیں کرے گی۔‘

ان کا کہنا تھا کہ ’ملک میں امن و استحکام کے لیے کوششیں جاری رکھیں گے، امن عمل کو خراب کرنے والوں کی کوئی گنجائش نہیں۔‘

آئی ایس پی آر کا کہنا ہے کہ ’آرمی چیف عاصم منیر نے انفارمیشن وارفیئر اور غلط فہمیاں پھیلانے کی کوششوں کے چیلنجز کے بارے میں آگاہ کیا۔‘

انہوں نے کہا کہ ’دشمن عناصر کی جانب سے مسلح افواج کو نشانہ بنانے کی مذموم کوشش کی جا رہی ہے، عوام کے تعاون سے ایسی کوششوں کو ناکام بنادیا جائے گا۔‘

آرمی چیف کو ملک کی موجودہ سکیورٹی صورت حال اور انسداد دہشت گردی کی جاری کوششوں بارے بریفنگ دی گئی۔

آئی ایس پی آر کے مطابق آرمی چیف نے دہشت گردی کے خلاف قانون نافذ کرنے والے اداروں کی پیشہ وارانہ کارکردگی اور کامیابیوں کو سراہا۔