’ائے کی پسوڑی پائی اے‘، پاکستانی گانے کے ریمیک پر شعیب اختر بھی بول پڑے

بالی وُڈ کی نئی فلم ’ستیا پریم کی کتھا‘ میں کوک سٹوڈیو پاکستان کے بلاک بسٹر گانے ’پسوڑی‘ کے ریمیک کو شامل کیے جانے پر جہاں دونوں ممالک کے شہری سوشل میڈیا پر اپنا ردِعمل دے رہے ہیں، وہیں پاکستان کے سابق فاسٹ بولر شعیب اختر بھی اس معاملے پر بول پڑے ہیں۔

پسوڑی 2022 میں کوک سٹوڈیو پاکستان پر گلوکار علی سیٹھی اور سائے گِل کی آواز میں ریلیز ہونے والا بلاک بسٹر گانا ہے جسے پاکستان اور انڈیا سمیت پوری دنیا میں بھرپور پذیرائی ملی۔

اس گانے کو انڈیا کی مشہور میوزک کمپنی ٹی سیریز کے تعاون سے کارتک آریان اور کیارا ایڈوانی کی فلم ’ستیا پریم کی کتھا‘ میں ریمیک کر کے شامل کیا گیا ہے۔

’ستیا پریم کی کتھا‘ میں اس گانے کو ’پسوڑی نو‘ کا ٹائٹل دیا گیا ہے جسے اریجیت سنگھ اور تُلسی کمار نے گایا ہے۔

اس بارے میں منگل کو سماجی رابطوں کی ویب سائٹ ٹوئٹر پر سپیڈ سٹار شعیب اختر نے پنجابی میں لکھا کہ ’ائے کی پسوڑی پائی اے‘ یعنی یہ کیا پسوڑی ڈالی ہوئی ہے۔

کوک سٹوڈیو پاکستان کے گانے ’پسوڑی‘ کو اب تک یوٹیوب پر لگ بھگ 60 کروڑ مرتبہ دیکھا جا چکا ہے جبکہ ٹی سیریز پر پیر کے روز اپلوڈ ہونے والے اس کے ریمیک کو اب تک ایک کروڑ سے زائد بار دیکھا جا چکا ہے۔

دوسری جانب رواں برس انڈیا میں شیڈول آئی سی سی کرکٹ ورلڈ کپ کے بارے میں انڈین یوٹیوب چینل ’سپورٹس تک‘ کے بارے میں بات کرتے ہوئے دنیا کے تیز ترین بولر نے کہا ہے کہ وہ چاہتے ہیں ایونٹ کا فائنل پاکستان اور انڈیا کے درمیان ہو۔

شعیب اختر نے کہا کہ ’میں انڈیا اور پاکستان کے درمیان فائنل چاہتا ہوں، چاہے وہ ممبئی میں کھیلیں یا احمد آباد میں۔‘

انہوں نے مزید کہا کہ ’2011 کا بدلہ لینا ہے اس بار۔‘

یاد رہے 2011 کے ورلڈ کپ کے سیمی فائنل میں انڈیا نے پاکستان کو شکست دی تھی۔

رواں برس ہونے والے کرکٹ ورلڈ کپ میں پاکستان اور انڈیا کے درمیان میچ 15 اکتوبر کو احمد آباد میں کھیلا جائے گا۔