متحدہ عرب امارات کی جانب سے ایک ارب ڈالر مل گئے: اسحاق ڈار

پاکستان کے وزیر خزانہ اسحاق ڈار نے کہا ہے کہ ’متحدہ عرب امارات نے ایک ارب ڈالر سٹیٹ بینک آف پاکستان کے اکاؤنٹ میں منتقل کر دیے ہیں۔‘

بدھ کو اپنے ویڈیو خطاب میں اسحاق ڈار کا کہنا تھا کہ ’وہ پاکستانی عوام، وزیراعظم اور آرمی چیف کی جانب سے متحدہ عرب امارات کی قیادت کے شکر گزار ہیں۔‘

وفاقی وزیر خزانہ کا مزید کہنا تھا کہ ’پاکستان کو سعودی عرب اور متحدہ عرب امارات کی جانب سے تین ارب ڈالر موصول ہو چکے ہیں۔‘

انہوں نے کہا کہ ’سعودی عرب اور متحدہ عرب امارات کی جانب سے تین ارب ڈالر ملنے کے بعد زرمبادلہ کے ذخائر میں بہتری آئے گی۔‘

پاکستان کے وزیراعظم شہباز شریف نے گذشتہ روز کہا تھا کہ ’ہمارے برادر ملک سعودی عرب نے دو ارب ڈالر سٹیٹ بینک میں جمع کرا دیے ہیں۔‘

 ’سعودی عرب ہمیشہ مشکل وقت میں ہماری مدد کرتا ہے۔ سعودی قیادت کا دل کی عمیق گہرائیوں سے شکریہ ادا کرتا ہوں۔‘

اس سے قبل وزیر خزانہ اسحاق ڈار کا کہنا تھا کہ ’برادر ملک سعودی عرب کی جانب سے دو ارب ڈالر سٹیٹ بینک آف پاکستان میں جمع کروا دیے گئے ہیں جو کریڈٹ ہو چکے ہیں۔‘

منگل کو ویڈیو پیغام میں وزیر خزانہ نے وزیراعظم شہباز شریف اور آرمی چیف عاصم منیر کی جانب سے سعودی قیادت بالخصوص شاہ سلمان اور ولی عہد شہزادہ محمد بن سلمان کا شکریہ ادا کیا۔

اسحاق ڈار نے بتایا کہ جمعے کو کلوزنگ کے وقت پاکستان کے زرمبادلہ کے ذخائر 10 ارب ڈالر سے کم یعنی 9 ارب 70 کروڑ ڈالر تھے جو اب 11 ارب 67 کروڑ ڈالر کے قریب پہنچ جائیں گے۔

انہوں نے کہا کہ سعودی عرب کی جانب سے دی گئی رقم آئندہ جمعے کو پاکستان کے زرمبادلہ کے ذخائر میں ظاہر ہوگی۔

خیال رہے کہ مارچ میں بین الاقوامی مالیاتی فنڈ (آئی ایم ایف) نے پاکستان سے مطالبہ کیا تھا کہ ایک ارب 10 کروڑ ڈالر کی قسط جاری ہونے سے پہلے وہ دوست ممالک اور ڈونر اداروں سے مالی معاونت کی یقین دہانی حاصل کرے۔

اسی سلسلے میں چین کی طرف سے پاکستان کو 2 ارب ڈالر کی رقم موصول ہوئی تھی جس کے بعد سعودی عرب نے  سٹیٹ بینک میں 2 ارب ڈالر جبکہ متحدہ عرب امارات نے ایک ارب ڈلر جمع کروا دیے ہیں۔