پاکستان قونصلیٹ جدہ میں یوم آزادی کی مناسبت سے پرچم کشائی تقریب

سعودی عرب کے شہر جدہ میں پاکستان کے 76 ویں یوم آزادی کے موقع پر پرچم کشائی کی تقریب کا اہتمام کیا گیا ۔یہ تقریب پاکستان قونصلیٹ جدہ میں ہوئی اور قونصل جنرل خالد مجید نے قومی ترانے کی گونج میں پاکستان کا پرچم لہرایا ۔ تقریب میں پاکستانی کمیونٹی کے افراد نے شرکت کی اور ملک کے ساتھ یکجہتی کا اظہار کیا ۔

تقریب میں پاکستان کے صدر اور وزیراعظم کے خصوصی پیغامات بھی پڑھ کر سنائے گئے ۔ قونصل جنرل خالد مجید نے کہا کہ پاکستان امن پسند ملک ہے اور علاقائی امن و استحکام کے لیے کام کرنے کے لیے پرعزم ہے۔ انہوں نے سعودی عرب کے ساتھ دوستانہ تعلقات کو مزید فروغ دینے کے لیے اپنی کوششیں جاری رکھنے کے پاکستان کے عزم کا اعادہ بھی کیا۔

قونصل جنرل نے مملکت میں پاکستانی کمیونٹی کو سہولت فراہم کرنے پر سعودی قیادت کا شکریہ ادا کیا۔ انہوں نے پاک سعودی تعلقات کو مضبوط بنانے میں بامعنی کردار ادا کرنے پر پاکستانی کمیونٹی کے تعاون کی بھی تعریف کی۔ نوجوان پاکستانی طلباء نے اس دن کی اہمیت کو اجاگر کرنے کے لیے تقاریر اور ٹیبلوز پیش کیے۔

علاوہ ازیں پاکستان سے خصوصی طور پر ائے گلوکار فرحان تبسم نے ملی نغمے گا کر حاضرین کا جوش ولولہ بڑھایا ہے۔تقریب کے اختتام پر کیک بھی کاٹا گیا۔