پاکستان سے ٹاپ پوزیشن چِھن گئی، انڈین ٹیم ون ڈے میں پہلے نمبر پر

انڈیا نے آسٹریلیا کو تین ون ڈے انٹرنیشنل میچز کی سیریز کے پہلے میچ میں پانچ وکٹوں سے شکست دے کر ون ڈے انٹرنیشنل کی رینکنگ میں پہلی پوزیشن حاصل کر لی ہے۔

جمعے کو انٹرنینشل کرکٹ کونسل (آئی سی سی) نے ایکس (ٹوئٹر) پر ایک ٹویٹ میں کہا کہ ’انڈیا، آسٹریلیا کے خلاف ایک آسان جیت کے بعد آئی سی سی مینز ون ڈے انٹرنیشنل کی رینکنگ پر پہلے نمبر پر آ گیا ہے۔‘

انڈیا سے پہلے یہ پوزیشن پاکستان کے پاس تھی۔

موہالی میں ہونے والے میچ میں انڈیا نے ٹاس جیت کر پہلے بولنگ کا فیصلہ کیا اور آسٹریلیا کی پوری ٹیم محمد شامی کی عمدہ بولنگ کی بدولت 50 اوورز میں 276 رنز بنا کر آؤٹ ہو گئی۔

ڈیوڈ وارنر 52 اور جاش انگلس 45 رنز بنا کر نمایاں رہے جبکہ شامی نے 51 رنز کے عوض پانچ وکٹیں اپنے نام کیں۔

انڈیا نے اس میچ میں اپنے سٹار بیٹرز روہت شرما اور وراٹ کوہلی کو نہیں کھلایا اور کپتانی کی ذمہ داری کے ایل راہُل نے نبھائی۔

277 رنز کے ٹارگٹ میں انڈین بیٹرز نے اپنی ٹیم کو شاندار آغاز فراہم کیا اور روتوراج گائکواڈ 71 رنز بنا کر آؤٹ ہوئے۔ شبھمن گل نے بھی 74 رنز کی شاندار اننگز کھیلی جبکہ کے ایل راہُل 58 رنز کے ساتھ ناٹ آؤٹ رہے اور سوریا کمار یادو 50 رنز بنا کر آؤٹ ہوئے۔

یوں انڈیا نے اپنے بیٹرز کی چار نصف سینچریوں کی بدولت 277 کا ہدف 49 ویں اوور میں پانچ وکٹوں کے نقصان پر حاصل کر لیا۔

آئی سی سی کی نئی ون ڈے انٹرنیشنل رینکنگ کے مطابق انڈیا پہلے، پاکستان دوسرے، آسٹریلیا تیست، جنوبی افریقہ چوتھے، انگلینڈ پانچویں، نیوزی لینڈ چھٹے، بنگلہ دیش ساتویں، سری لنکا آٹھویں، افغانستان نویں اور ویسٹ انڈیز 10 ویں نمبر پر ہے۔