شاہ رخ خان کا 58 ویں سالگرہ پر اپنے مداحوں کو ’ڈنکی‘ کے ٹیزر کا تحفہ

بالی وُڈ کے کنگ شاہ رخ خان جمعرات کو اپنی 58 ویں سالگرہ منا رہے ہیں۔

سنہ 1992 میں فلم ’دیوانہ‘ سے اپنے کیریئر کا آغاز کرنے والے شاہ رخ خان کو دنیا کا سب سے بڑا ’فلمی سپرسٹار‘ کہا جاتا ہے۔

شاہ رخ خان کی سالگرہ اُن کے مداحوں کے لیے کسی تہوار سے کم نہیں ہوتی اور ہر سال 2 نومبر کو دنیا بھر میں اُن کے مداح پورا دن اپنے سپرسٹار کی سالگرہ مناتے ہیں۔

رواں برس شاہ رخ خان اور اُن کے مداحوں کے لیے ایک شاندار سال ثابت ہوا ہے جس میں اُن کی دو آل ٹائم بلاک بسٹر فلمیں ریلیز ہوئی ہیں۔

اس سال شاہ رخ خان کی ریلیز ہونے والی پہلی فلم ’پٹھان‘ تھی جس نے باکس آفس پر کامیابی کے جھنڈے گاڑ دیے تھے۔

پٹھان نے انڈیا سمیت دنیا بھر سے 1050 کروڑ روپے کمائے تھے جس کے بعد وہ انڈین سنیما کی تاریخ کی سب سے کامیاب فلم بن گئی تھی۔

اس فلم کے بعد کنگ خان کی دوسری فلم ’جوان‘ ریلیز ہوئی جس نے پٹھان سمیت انڈین سنیما کے اگلے پچھلے تمام ریکارڈ توڑ دیے۔

جوان نے اب تک صرف انڈیا میں 642 کروڑ روپے کا کاروبار کیا ہے اور انڈیا سمیت دنیا بھر سے 1117 کروڑ کمائے ہیں۔

دوسری جانب بالی وُڈ کے بادشاہ کی سالگرہ پر اُن کے مداحوں کا جم غفیر ممبئی میں واقع اُن کے گھر ’منت‘ کے باہر موجود ہے۔

شاہ رخ خان نے اپنی سالگرہ کے دن رواں برس اپنی ریلیز ہونے والی تیسری فلم ’ڈنکی‘ کا ٹیزر بطور سالگرہ کا تحفہ جاری کر دیا ہے۔
 

ڈنکی کے ٹیزر کے مطابق اس فلم کی کہانی پانچ ایسے دوستوں کے گرد گھومتی ہے جو غیر قانونی طور پر انڈیا سے انگلینڈ ڈنکی لگا کر جاتے ہیں۔

اس فلم میں شاہ رخ خان کے ساتھ مرکزی کاسٹ میں تاپسی پنوں، وکی کوشال اور بومن ایرنی شامل ہیں۔

ڈنکی کے ذریعے شاہ رخ خان پہلی مرتبہ ہدایتکار راج کمار ہیرانی کے ساتھ بڑے پردے پر جلوہ گر ہونے والے ہیں۔

کنگ خان کی 58 ویں سالگرہ پر سماجی رابطوں کی ویب سائٹ ایکس (ٹوئٹر) پر بھی انہیں خوب خراج تحسین پیش کیا جا رہا ہے۔

میڈی نے اپنی ٹویٹ میں شاہ رخ خان کے گھر کے باہر مداحوں کے ہجوم کی ویڈیو شیئر کرتے ہوئے لکھا کہ ’مجھے آپ اُس وقت آ کر بتانا جب اس کرہ ارض پر کوئی دوسرا سٹار ایسا ہجوم اکٹھا کر سکے۔ شاہ رخ خان کی ایک جھلک دیکھنے کے لیے ان کے مداح پاگل ہو رہے ہیں۔‘
 

سونی میوزک انڈیا نے اپنی ٹویٹ میں لکھا کہ ’جب اُس نے کہا کہ میں ہی بہترین ہوں، تو ہم اس بات سے انکار نہیں کر سکتے۔ بالی وُڈ کے بادشاہ کو سالگرہ مبارک ہو۔‘
 

سید عرفان احمد نے شاہ رخ خان کی جانب سے اپنے مداحوں کو اپنے گھر کے جنگلے سے ہاتھ ہلانے کی ویڈیو شیئر کرتے ہوئے لکھا کہ ’شاہ رخ خان منت سے اپنے مداحوں کے لیے ہاتھ ہلا رہے ہیں۔ کنگ خان سالگرہ مبارک ہو۔‘
 

موڈی ڈیمسل اپنی ٹویٹ میں لکھتے ہیں کہ ’شاہ رخ خان، وہ انسان جو کھلی بانہوں سے پچھلے 30 برسوں سے پیار کو پھیلا رہے ہیں۔‘