قدرتی مناظر سے مالا مال ’وادی ابوحلیفا‘ جہاں سیاح کھینچے چلے جاتے ہیں

سعودی عرب مکہ مکرمہ ریجن کی خلیص کمشنری میں واقع  وادی ’ابوحلیفا‘ ان دنوں مقامی سیاحوں کی توجہ کا مرکز بنی ہوئی ہے۔

شہروں کی تیز رفتار زندگی سے دور پرسکون ماحول کے متلاشی افراد کے لیے بہترین جگہ مانی جا رہی ہے۔ ماضی میں وادی کا شمار اہم تجارتی مقام کے طورپرکیا جاتا تھا۔

سعودی خبررساں ادارے ایس پی اے کے مطابق ’وادی ابوحلیفا‘ میں ان دنوں بارش کے بعد پہاڑ اور میدان سبزہ زاروں میں بدل گئے ہیں جس سے غیرمعمولی طورپر یہ ایک تفریحی مقام بن گیا۔

’وادی ابوحلیفا‘  جدہ شہر سے شمال مشرق کی جانب 150 کلو میٹر کی دوری پر واقع ہے۔

سیاحوں کے لیے ’وادی ابوحلیفا‘ کے چشمے، معتدل آب و ہوا، دلکش نظارے، ہریالی اور سب سے بڑھ کر پرسکون ماحول موجود ہے۔

 ایس پی اے کی جانب سے ایک ویڈیو بھی شیئر کی ہے جس می سیاحوں کو وادی کے پرفضا مقامات سے لطف اندوز ہوتے ہوئے دیکھا جاسکتا ہے۔

’وادی ابوحلیفا‘ ایک زرعی علاقہ ہے۔ یہ  زرعی فارمز اور دیدہ زیب مناظر کے حوالے سے بھی مشہور ہے۔

مکہ مکرمہ ریجن کا علاقہ ’خلیص‘ ماضی میں زرعی پیداوار کی فراہمی کے لیے غیرمعمولی شہرت کا حامل رہا ہے۔ یہ تین اہم شہروں مکہ مکرمہ ، جدہ اور مدینہ منورہ کے درمیان واقع ہے۔

خلیص کے علاقے سے تجارتی قافلے گزر کران شہروں میں اپنا مال تجارت لے جایا کرتے تھے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں