’تارے زمیں پر‘ کے چائلڈ سٹار درشیل سفاری کی نئی تصویر وائرل

بالی وُڈ کے مسٹر پرفیکٹ عامر خان کی بیٹی ایرا خان کی شادی کے استقبالیہ کی تقریب میں فلم انڈسٹری کے ستاروں کے جھرمٹ نے شرکت کی۔

ایرا خان کی شادی کے استقبالیہ کی تقریب میں جہاں فلم نگری کے بڑے ستارے اور مہمان نظر آئے وہیں 2007 میں ریلیز ہونے والی بلاک بسٹر فلم ’تارے زمیں پر‘ کے چائلڈ سٹار درشیل سفاری بھی تقریب میں دکھائی دیے۔

اسی سلسلے میں فوٹو اینڈ ویڈیو شیئرنگ پلیٹ فارم انسٹاگرام پر درشیل سفاری کی نئی تصویر وائرل ہے جسے دیکھ کر فلم بین ماضی کے جھروکوں میں چلے گئے ہیں۔

درشیل سفاری کی نئی تصویر اداکارہ ٹِسکا چوپڑا نے انسٹاگرام پر شیئر کی۔

ٹِسکا چوپڑا نے انسٹاگرام پوسٹ میں اپنی تصاویر شیئر کرنے کے ساتھ ساتھ درشیل سفاری کے ساتھ سیلفی بھی اپلوڈ کی۔

ٹِسکا چوپڑا نے اپنی پوسٹ میں لکھا کہ ’15 برس بعد کچھ دیکھنے کے لیے سوائپ کریں۔‘
 

یہاں واضح رہے کہ ٹِسکا چوپڑا نے تارے زمیں پر فلم میں درشیل سفاری (اِشان اوستھی) کی والدہ کا کردار ادا کیا تھا۔

سنہ 2007 میں ریلیز ہونے والی ’تارے زمیں پر‘ کی کہانی ایسے طالبعلم (درشیل سفاری) کے گرد گھومتی ہے کہ جو ڈِسلیکسیا کی ذہنی بیماری کا شکار ہوتا ہے۔ اس فلم میں عامر خان سکول ٹیچر کا کردار ادا کرتے ہیں جو درشیل سفاری کی پڑھائی میں مدد کرتے ہیں۔

اس فلم کے علاوہ درشیل سفاری ’بم بم بولے‘، ’زوکومون‘ اور ’مڈ نائٹس چائلڈ‘ جیسی فلموں بھی میں کام کر چکے ہیں۔