جلسوں میں مُفت بجلی کے اعلانات، ’سب بولی لگاؤ جو زیادہ یونٹس دے ووٹ اُسی کا‘

الیکشن سے قبل پاکستان میں سیاسی جماعتیں مختلف شہروں میں اپنی انتخابی مہم جاری رکھے ہوئے ہیں جس میں وہ عوام کے سامنے اپنا اپنا منشور رکھتے ہوئے ان سے ووٹ مانگ رہے ہیں۔

بعض پارٹیوں کے منشور میں مشترکہ نکتہ عوام کو مفت بجلی کی فراہمی کا ہے، تاہم بجلی کے یونٹس کی تعداد مختلف ہے جو اس وقت سوشل میڈیا پر مختلف تبصروں کے ساتھ زیر بحث بھی ہے۔
پاکستان مسلم لیگ (ن) کی چیف آرگنائزر مریم نواز نے جمعرات کو حافظ آباد میں جلسے سے خطاب میں کہا کہ ’ہماری کوشش ہے کہ ہر گھر میں گیس ہو، بجلی کے بل بھی کم ہوں اور 200 سے کم جن کے یونٹس ہوں انہیں مفت بجلی ملے۔‘

مفت بجلی کی فراہمی کا اعلان اس سے قبل استحکام پاکستان پارٹی کے صدر عبدالعلیم خان اور پیپلز پارٹی کے چیئرمین بلاول بھٹو زرداری نے بھی کیے۔  مفت بجلی کی فراہمی کے اعلانات سن کر کچھ سوشل میڈیا صارفین خوش ہونے کے بجائے حیران ہیں تو بعض کا سوال ہے کہ اتنی بجلی آئے گی کہاں سے؟
ایکس ہینڈل ’موڈی سرکار‘ پر مشورہ دیا گیا کہ ’ٹی وی پر کسی پروگرام میں سارے لیڈرز کو بلایا جائے اور بجلی کے فری یونٹ کی بولی لگوائی جائے۔ جو سب سے زیادہ یونٹ کا اعلان کرے اسے ووٹ دیا جائے۔

مفت بجلی فراہمی کے معاملے پر سوشل میڈیا صارف عمیر لکھتے ہیں کہ ’پی پی پی 300 یونٹ بجلی فری دینے کے وعدے کر رہی ہے۔ استحکام پارٹی بھی 300 یونٹ جبکہ ن لیگ 200 یونٹ دینے کے وعدے کر رہی ہے۔‘

انہوں نے مزید لکھا کہ ’لیکن دوسری طرف آئی ایم ایف کا پلان ہے 300 روپے فی یونٹ بجلی کا بم پاکستانیوں پر گرایا جائے، میچ دلچسپ مرحلے میں۔‘

سلمان زئی نے لکھا کہ ’بجلی 17 روپے فی یونٹ سے 65 روپے یونٹ کرنے والے اب ووٹ لے کر بجلی فری دیں گے۔ عوام کو بے وقوف سمجھتے ہو؟‘

مبینہ خان نے لکھا کہ ’بلاول بھٹو کے بعد مریم نواز نے بھی 200 یونٹ تک بجلی فری کرنے کی بات کی ہے۔‘

’میرا خیال ہے جو بھی بات ہو 200 یونٹ تک بجلی مفت نہیں ہونی چاہیے، بلکہ بجلی سستی ہونی چاہیے اور اس کا ایک ٹیرف مقرر ہو۔‘

انہوں نے مزید لکھا کہ ’اس سب کا بوجھ مہنگائی کی شکل میں مڈل کلاس پر آتا ہے۔ اب پنجاب میں لوگ میٹر زیادہ لگوا رہے ہیں۔ یعنی اگر آپ کے 600 یونٹس ایک میٹر پر جلیں تو 50 ہزار بل آئے گا۔ اگر یہ 3 میٹروں پر جلیں تو بجلی فری۔‘

ایکس ہینڈل رانا ساب پر لکھا گیا کہ ’میرے تو 500 یونٹ فری ہوگئے گائیز تم لوگ اپنا اپنا دیکھ لو۔‘

یاد رہے کہ اس سے قبل بلاول بھٹو زرداری نے گڑھی خدابخش میں جلسے سے خطاب کے دوران کہا کہ ’ہم تنخواہیں دو گنا کریں گے جبکہ 300 یونٹس تک بجلی مفت فراہم کی جائے گی۔‘

استحکام پاکستان پارٹی کے خانیوال جلسے میں عبدالعلیم خان نے اعلان کیا تھا کہ ’استحکام پاکستان پارٹی حکومت میں آنے کے بعد مزدور کی کم سے کم اُجرت 50 ہزار کر دے گی اور صارفین کو 300 یونٹ تک بجلی مفت دی جائے گی۔‘