بنگلہ دیش نے نیوزی لینڈ کو 5وکٹوں سے شکست دیدی

کارڈیف.... بنگلہ دیش نے شکیب الحسن اور محموداللہ کی شاندار سنچریوں کی بدولت نیوزی لینڈ کو 5وکٹوں سے شکست دے کر چیمپیئنز ٹرافی سے باہر کردیا۔کارڈیف میں کھیلے جا رہے چیمپیئنز ٹرافی کے گروپ اے کے میچ میں نیوزی لینڈ نے ٹاس جیت کر پہلے بیٹنگ کا فیصلہ کیا تو اوپنرز نے اپنی ٹیم کو7 اوورز میں 46 رنز کا مثبت آغاز فراہم کیا لیکن پھر دونوں اوپنرز لیوک رونچی اور مارٹن گپٹل بالترتیب 16 اور 33 رنز بنانے کے بعد پویلین لوٹ گئے۔69 رنز پر2 وکٹیں گرنے کے بعد نیوزی لینڈ کی سب سے تجربہ کار بلے باز کین ولیمسن اور روس ٹیلر وکٹ پر اکٹھا ہوئے اور 83 رنز کی شراکت قائم کر کے ٹیم کی پوزیشن مستحکم کردی۔ولیمسن 57 رنز بنانے کے بعد پویلنی لوٹ گئے ٹیلر نے عمدگی سے بیٹنگ کا سلسلہ جاری رکھا اور نیل بروم کے ساتھ ٹیم کی ڈبل سنچری مکمل کرائی۔نیوزی لینڈ نے 38.2 اوورز میں ڈبل سنچری مکمل کی تو ان کے صرف 3 کھلاڑی آﺅٹ تھے جس سے ایسا محسوس ہوتا تھا کہ اختتامی اوورز میں تیز رفتاری سے بیٹنگ کرتے ہوئے 300 سے زائد رنز کا مجموعہ اسکور بورڈ پر سجا لیں گے لیکن بنگلہ دیشی بولرز نے آخری 10 اوورز میں شاندار بولنگ کا مظاہرہ کرتے ہوئے ان کے ا میدوں پر پانی پھیر دیا۔مصدق حسین نے ٹیم کو یکے بعد دیگرے 3 کامیابیاں دلائیں اور نیوزی لینڈ کی ٹیم مقررہ اوورز میں 8 وکٹ کے نقصان پر 265 رنز ہی بنا سکی۔روس ٹیلر 63، نیل بروم 36 اور جمی نیشام 23 رنز بنا کر نمایاں رہے۔ بنگلہ دیش کی جانب سے تسکین احمد نے2 وکٹیں لیں۔ ہدف کے تعاقب میں ٹم ساﺅتھی نے شاندار اسپیل کرتے ہوئے بنگلہ دیش بیٹنگ لائن کو تہس نہس کردیا اور بنگلہ دیش کی ٹیم 33 رنز پر 4 وکٹیں گنوا کر مشکلات سے دوچار تھی۔اس موقع پر شکیب الحسن اور محموداللہ وکٹ پر یکجا ہوئے اور محتاط انداز میں اسکور کو آگے بڑھاتے ہوئے ہدف کی جانب پیش قدمی شروع کی۔دونوں کھلاڑیوں نے عمدہ بیٹنگ کا مظاہرہ کرتے ہوئے رن ریٹ بھی برقرار رکھتے ہوئے بنگلہ دیش کوجیت کی راہ پر گامزن رکھا۔دونوں نے 224 رنز کی شاندار شراکت قائم کر کے نیوزی لینڈ کو میچ سے باہر کردیا اور شکیب الحسن 114 رنز کی عمدہ باری کھیلنے کے بعد پویلین لوٹے شکیب کو میچ کا بہترین کھلاڑی قرار دیا گیا۔ مصدق حسین نے چوکا لگا کر اپنی ٹیم کو 16 گیندوں قبل ہی فتح سے ہمکنار کرا دیا، محموداللہ نے ناقابل شکست 102 رنز کی اننگز کھیلی۔