کون بنے گا وزیراعظم؟ شہباز شریف اور عمر ایوب میں مقابلہ آج
صدارتی امیدوار محمود خان اچکزئی، عمران خان اور نواز شریف کے اتحادی رہ چکے ہیں
بلوچستان کے مسائل، ’ڈائیلاگ، ڈیٹرنس اور ڈویلپمنٹ پالیسی کے تحت نمٹیں گے‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہباز شریف 201 ووٹ لے کر پاکستان کے وزیراعظم منتخب
مسلم لیگ ن کے صدر شہباز شریف 201 ووٹ لے کر پاکستان کے 24ویں وزیراعظم منتخب ہو گئے ہیں، جبکہ سنی اتحاد کونسل کے امیدوار عمر ایوب نے 92 ووٹ حاصل کیے ہیں۔
مسلم لیگ ن اور دیگر اتحادی جماعتوں کی جانب سے شہباز شریف دوسری مرتبہ وزارت عظمٰی کے امیدوار تھے، جبکہ سنی اتحاد کونسل نے عمر ایوب کو وزارت عظمٰی کا امیدوار بنایا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فارم 45 کے ایم این اے آتے تو آج ہماری تعداد 180 ہوتی، عمر ایوب کا خطاب
سنی اتحاد کونسل کے امیدوار اور پاکستان تحریک انصاف کے رہنما عمر ایوب نے ایوان سے خطاب میں کہا کہ موجودہ حکومت پی ڈی ایم کا تسلسل ہے جس نے ان کے قائد عمران خان کو گرفتار کیا اور پی ٹی آئی سے انتخابی نشان چھینا۔
عمر ایوب نے کہا ’ہم اس وقت تک کھڑے رہیں گے جب تک عمران خان وزیر اعظم کا حلف نہیں اٹھا لیتے۔‘
عمر ایوب کی تقریر کے دوران مسلم لیگ ن کے اراکین نے گھڑی چور کے نعرے لگائے۔
سنی اتحاد کونسل کے امیدوار عمر ایوب نے کہا کہ یہاں موجود ن لیگ اور باقی پارٹیوں کے ارکان کے چہرے مرجھائے ہوئے ہیں کیونکہ انہیں معلوم ہے ان کا مینڈیٹ چوری شدہ ہے۔
’یہاں موجود مسلم لیگ ن اور دیگر پارٹیوں کے ایم این ایز فارم 47 کی پیداوار ہیں۔ فارم 45 کے ایم این اے آتے تو آج ہماری تعداد 180 ہوتی۔ جو ریزرو سیٹ ملا کر 200 سے زائد تھی۔‘
انہوں نے مزید کہا کہ سپیکر، ڈپٹی سپیکر اور وزیر اعظم کا الیکشن غیر قانونی ہے۔
تقریر کے دوران مسلم لیگ ن اور سنی اتحاد کونسل کے اراکین ایک مرتبہ پھر ڈائس کے سامنے آ گئے اور ایک دوسرے کے خلاف نعرے بازی کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
’پاکستانیوں کو خادم مل گیا‘، وزیراعلٰی مریم نواز کی شہباز شریف کو مبارکباد
وزیراعلٰی پنجاب مریم نواز شریف نے مسلم لیگ (ن) کے صدر شہباز شریف کو دوسری مرتبہ وزیراعظم پاکستان منتخب ہونے پر مبارکباد دی ہے۔
انہوں نے ایک بیان میں کہا ہے کہ ’پاکستانیوں کو خادم مل گیا۔‘
’شہباز شریف کی سپیڈ، محنت، کارکردگی اور ایمانداری کی دنیا معترف ہے۔‘
ان کا کہنا تھا کہ وزیراعظم پاکستان کے عہدے پر شہباز شریف کا انتخاب حقیقی جمہوریت کی فتح ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیراعظم کی تقریب حلف برداری کا شیڈول جاری
ایوان صدر میں نو منتخب وزیراعظم کی حلف برداری چار مارچ بروز پیر کو سہ پہر دو بجے کر پینتالیس منٹ پر ہوگی۔
ایوان صدر نے تقریب حلف برداری کے لیے تمام تیاریاں مکمل کر لیں۔ تقریب حلف برداری کے لیے دعوت نامے ارسال کر دیے گئے۔
آرمی چیف، نگراں وزیراعظم، چیئرمین سینیٹ، سپیکر قومی اسمبلی و دیگر اعلی حکام شرکت کریں گے۔ چاروں صوبوں کے گورنرز، وزرائے اعلی بھی تقریب میں شریک ہوں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بی این پی کے سردار اختر مینگل نے ووٹ کاسٹ نہیں کیا
بی این پی کے سردار اختر مینگل ن لیگ اور سنی اتحاد کونسل کے اصرار کے باوجود ووٹ ڈالنے نہیں گئے اور بدستور اپنی نشست پر موجود رہے۔
محمود خان اچکزئی نے سنی اتحاد کونسل کے امیدوار کو ووٹ کاسٹ کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انٹرا پارٹی الیکشن، بیرسٹر گوہر علی خان تحریک انصاف کے بلامقابلہ چیئرمین منتخب
پاکستان تحریک انصاف نے اعلان کیا ہے کہ بیرسٹر گوہر علی خان پارٹی کے بلامقابلہ چیئرمین اور عمر ایوب جنرل سیکریٹری منتخب ہو گئے ہیں۔
اتوار کو اسلام آباد میں پریس کانفرنس کے دوران ترجمان پی ٹی آئی رؤف حسن نے کہا کہ ’پارٹی چیئرمین کے لیے تین امیدواروں کی درخواست قبول کی تھی، تاہم اشرف جبار اور اسلم صاحب پارٹی مفاد کے لیے دستبردار ہوئے اور بیرسٹر گوہر علی خان پارٹی کے بلامقابلہ چیئرمین منتخب ہوگئے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نئے صدر کا انتخاب، پارلیمان کا مشترکہ اجلاس 9 مارچ کو طلب
صدارتی انتخابات کے لیے ووٹنگ کے حوالے سے سپیکر قومی اسمبلی ایاز صادق نے پارلیمان کا مشترکہ اجلاس 9 مارچ کو طلب کرلیا۔ اجلاس صبح دس بجے منعقد ہوگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدارتی امیدوار سے 15 برسوں کا حساب مانگیں گے: فاروق ستار
ایم کیو ایم پاکستان کے رہنما ڈاکٹر فاروق ستار نے صدارتی الیکشن کے حوالے سے کہا ہے کہ ’جو صدر کا الیکشن لڑ رہے ہیں انہوں نے ابھی تک ہم سے رجوع نہیں کیا۔ پیاسا کنویں کے پاس آتا ہے۔ کنواں پیاسے کے پاس نہیں آتا۔‘
انہوں نے کہا کہ ’جب صدارتی امیدوار ووٹ مانگنے آئیں گے تو ہم بھی ان سے 15 برسوں کا حساب مانگیں گے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جعلی اور حقیقی مینڈیٹ کا مقابلہ ہے: علی محمد خان
پی ٹی آئی رہنما علی محمد خان نے کہا ہے کہ ’جعلی اور حقیقی مینڈیٹ کا مقابلہ ہے، فارم 45 اور فارم 47 کا مقابلہ ہے۔ عارضی جیت چاہے جعلی مینڈیٹ کی ہو، آخری جیت ہمیشہ حق کی ہوتی ہے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہباز شریف پاکستان کے لیے خوش خبری ہیں: مریم اورنگزیب
پاکستان مسلم لیگ (ن) کی سیکریٹری اطلاعات مریم اورنگزیب نے کہا ہے کہ ’وزیراعظم شہباز شریف پاکستان کے لیے خوش خبری ہیں۔ ترقی کا جو سفر 2018 میں رک گیا تھا پھر سے شروع ہو گا۔‘
انہوں نے کہا کہ ’نوجوانوان کے روزگار، کاروبار اور ترقی کا دور شروع ہو گا۔ شہباز شریف نے پاکستان کو ڈیفالٹ سے بچایا تھا، اب معیشت کو استحکام دیں گے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کون بنے گا وزیراعظم؟ شہباز شریف اور عمر ایوب میں مقابلہ آج
