صدر کون بنے گا؟ مفاہمت کے بادشاہ آصف زرداری یا اسٹیبلشمنٹ مخالف محمود اچکزئی
بے نظیر کے قتل پر ’پاکستان کھپے‘ کا نعرہ لگانے والے آصف علی زرداری
اسٹیبلشمنٹ کی سیاست میں عدم مداخلت کے حامی صدارتی امیدوار محمود خان اچکزئی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدر کے انتخاب کے لیے ووٹنگ، حکومتی اور اپوزیشن ارکان کی نعرے بازی
پاکستان میں نئے صدر کے انتخاب کے لیے پولنگ کا عمل جاری ہے جبکہ قومی اسمبلی ہال میں ہونے والی ووٹنگ کے دوران حکومتی اور اپوزیشن ارکان کی ایک دوسرے کے خلاف نعرے بازی بھی جاری ہے۔
وزیراعظم شہباز شریف اور صدارتی امیدوار آصف علی زرداری نے اپنے اپنے ووٹ کاسٹ کر لیے ہیں۔
قومی اسمبلی ہال میں اسلام اباد ہائی کورٹ کے چیف جسٹس عامر فاروق کی پریذائڈنگ میں پولنگ کا عمل 11 منٹ کی تاخیر سے شروع ہوا تو سنی اتحاد کونسل کے ارکان نے احتجاج کیا۔
ارکان نے عمران خان کے حق میں نعرے لگائے اور ساتھ میں مطالبہ کیا کہ الیکٹورل کالج مکمل نہ ہونے کی وجہ سے انتخابات ملتوی کیے جائیں۔ پولنگ کا عمل شروع کرنے سے قبل پولنگ ایجنٹس کا تقرر عمل میں لایا گیا۔ آصف علی زرداری کی پولنگ ایجنٹ شیری رحمان جبکہ محمود خان اچکزئی کے پولنگ ایجنٹ سردار شفیق ترین مقرر کیے گئے۔
وزیراعظم شہباز شریف اور صدارتی امیدوار آصف علی زرداری ایک ساتھ ایوان میں پہنچے تو حکومتی ارکان نے ڈیسک بجا کر ان کا استقبال کیا۔
حروف تہجی کے اعتبار سے ارکان نے ووٹ ڈالنے شروع کیے تو سب سے پہلا ووٹ عامر طلال گوپانگ نے کاسٹ کیا۔
شہباز شریف ووٹ ڈالنے گئے تو اپوزیشن ارکان نے چور چور مینڈیٹ چور کے نعرے لگائے جبکہ حکومت کی جانب سے شیر شیر اور گھڑی چور کے نعرے بلند کیے۔
آصف علی زرداری نے ووٹ کاسٹ کیا تو حکومتی ارکان نے ڈسک بجا کر ان کا استقبال کیا۔ ووٹ کاسٹ کرنے کے بعد آصف علی زرداری نے اپنے مد مقابل محمود خان اچکزئی سے گلے ملے۔ ان کے بعد بلاول بھٹو زرداری نے بھی ووٹ کاسٹ کیا اور وہ بھی محمود خان اچکزئی سے ملے۔
صدارتی انتخابات کے موقع پر آصف علی زرداری کی صاحبزادیاں بختاور بھٹو زرداری اور آصفہ بھٹو زرداری موجود تھیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضابطہ اخلاق کی خلاف ورزی کرنے پر سونیا علی کا ووٹ چیلنج
پنجاب اسمبلی میں حکومتی اتحاد نے ضابطہ اخلاق کی خلاف ورزی کرنے پر سونیا علی کا ووٹ چیلنج کر دیا۔
سنی اتحاد کونسل کی رکن سونیا علی نے پنجاب اسمبلی میں اپنا ووٹ دکھایا تھا۔
پولنگ ایجنٹ نے الیکشن کمیشن کو ووٹ منسوخ کرنے کی تحریری درخواست دے دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلوچستان اسمبلی کے 15 ارکان کا صدارتی انتخابات میں حصہ نہ لینے کا اعلان
بلوچستان اسمبلی میں بھی صدارتی انتخابات کے لیے پریزائیڈنگ افسر کے فرائض چیف جسٹس نعیم اختر افغان سرانجام دے رہے ہیں۔ قائمقام چیف جسٹس ہاشم خان کاکڑ بھی ان کے ہمراہ ہیں۔
پہلا ووٹ پیپلز پارٹی کے علی مدد جتک نے ڈالا۔ اب تک وزیراعلیٰ بلوچستان سرفراز احمد بگٹی، سابق چیئرمین سینٹ صادق سنجرانی سمیت 30 سے زائد ارکان ووٹ کاسٹ کر چکے ہیں۔
بلوچستان کی 65 رکنی اسمبلی میں 62 ارکان اپنی حق رائے دہی استعمال کرسکیں گے۔ سردار اختر مینگل اور جام کمال کی جانب سے قومی اسمبلی میں جانے کی وجہ سے دو نشستیں خالی جبکہ ایک نشست (پی بی 22 حب ) پر کامیاب امیدوار کا نوٹیفکیشن اب تک جاری نہیں ہوسکاہے۔
بلوچستان واحد صوبائی اسمبلی ہے جس کے ہر رکن کا ووٹ مکمل ووٹ شمار ہوتا ہے جبکہ سندھ، پنجاب اور خیبر پختونخوا اسمبلیوں کے ارکان کی تعداد بلوچستان کے مجموعی ارکان سے تقسیم کرکے ایک ووٹ بنتا ہے۔
بلوچستان میں پیپلز پارٹی کے صدارتی امیدوار آصف علی زرداری کو اتحادی جماعت مسلم لیگ ن اور بلوچستان عوامی پارٹی کی حمایت حاصل ہے۔ چار نشستیں رکھنے والی نیشنل پارٹی اور تین نشستیں رکھنے والی اے این پی نے بھی صدارتی انتخاب میں پیپلز پارٹی کی حمایت کا اعلان کیا ہے۔ پیپلز پارٹی اور ان کے اتحادیوں اور حمایتوں کو مجموعی طور پر 47 ارکان کی حمایت حاصل ہے۔
بلوچستان اسمبلی کے 15 ارکان نے صدارتی انتخابات میں حصہ نہ لینے کا اعلان کیا ہے۔ ان میں جمعیت علمائے اسلام کے 12، جماعت اسلامی اور حق دو تحریک کا ایک ایک رکن شامل ہیں۔ بلوچستان نیشنل پارٹی (عوامی) کے اکلوتے رکن اسد بلوچ نے احتجاجاً صدارتی انتخابات کے بائیکاٹ کا اعلان کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محمود خان اچکزئی کو بلوچستان اسمبلی میں کوئی پولنگ ایجنٹ نہیں مل سکا
پاکستان تحریک انصاف کے حمایت یافتہ سنی اتحاد کونسل اور محمود خان اچکزئی کی جماعت پشتونخوا ملی عوامی پارٹی کا بلوچستان اسمبلی میں کوئی رکن نہیں اور نہ ہی کسی نے ان کی حمایت کا اعلان کیا ہے۔
صدارتی امیدوار محمود خان اچکزئی کو بلوچستان اسمبلی میں کوئی پولنگ ایجنٹ بھی نہیں مل سکا۔ انہوں نے اپنی جماعت پشتونخوا میپ کے صوبائی صدر عبدالقہارخان ودان کو پولنگ ایجنٹ مقرر کیا تھا مگر الیکشن کمیشن نے انہیں پولنگ ایجنٹ کے فرائض انجام دینے سے روک دیا اور کہا کہ پولنگ ایجنٹ کے لیے اسمبلی رکن ہونا ضروری ہے۔ عبدالقہار خان ودان کا کہنا تھا کہ انہیں انتخابی عمل کو دیکھنے کی اجازت بھی نہیں دی جا رہی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیر اعظم شہباز شریف نے صدارتی انتخاب کے لیے اپنا ووٹ کاسٹ کر دیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلوچستان اسمبلی میں 33 اراکین نے ووٹ ڈال لیے، بی این پی عوامی کا بائیکاٹ
بلوچستان اسمبلی میں صدارتی انتخاب کے لیے پانچ ووٹ کاسٹ کر دیے گئے۔
ووٹ کاسٹ کرنے والوں میں علی مدد جتک، شعیب نوشیروانی، سنجے کمار طارق مگسی اور ضیا لانگو شامل ہیں۔
بلوچستان اسمبلی میں کل 62 ووٹ ہیں۔
بلوچستان نیشل پارٹی عوامی کے سربراہ میر اسد بلوچ نے صدارتی انتخاب سے بائیکاٹ کا اعلان کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سندھ اسمبلی میں 73 اراکین نے ووٹ ڈال لیے
صدارتی انتخاب کے لیے سندھ اسمبلی میں پولنگ کا عمل چیف جسٹس سندھ ہائی کورٹ عقیل احمد عباسی کی نگرانی میں ہو رہا ہے۔
جسٹس عقیل عباسی نے پریذائیڈنگ افسر کے فرائض انجام دے رہے ہیں۔
متحدہ قومی موومنٹ کے رکن اسمبلی عبدالباسط نے پہلا ووٹ کاسٹ کیا۔
صدر کے امیدوار آصف زرداری کی بہن فریال تالپور سمیت دیگر ارکان نے اپنا ووٹ ڈالا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدارتی انتخاب کے لیے خیبر پختونخوا اسمبلی میں ووٹنگ
صدارتی انتخاب کے لیے خیبر پختونخوا اسمبلی میں پولنگ کا عمل جاری ہے۔
سنی اتحاد کونسل کے امیدوار محمود خان اچکزئی کے پولنگ ایجنٹ فخر جہاں ہیں جبکہ احمد کریم کنڈی کو آصف علی زرداری کا پولنگ ایجنٹ مقرر کیا گیا ہے۔
ارشد ایوب، احمد کریم کنڈی، مینہ خان اور دیگر ارکان نے اپنا ووٹ کاسٹ کر دیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدارتی الیکشن غیرقانونی اور غیر آئینی ہے، عمر ایوب
پاکستان تحریک انصاف کے رہنما عمر ایوب نے صدارتی الیکشن کو غیرقانونی و غیرآئینی قرار دیا تھا۔
الیکشن کے لیے پارلیمنٹ آمد کے موقع پر میڈیا سے گفتگو میں ان کا کہنا تھا کہ جب تک مخصوص سیٹوں کا معاملہ حل نہیں ہوتا صدارتی الیکشن کو ملتوی کیا جانا چاہیے۔
انہوں نے یہ بھی کہا کہ ’الیکٹورل کورم پورا نہیں ہے۔ ہم نے اس پر پہلے بھی بارہا آواز اٹھائی ہے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدارتی انتخاب کے لیے قومی اسمبلی اور صوبائی اسمبلیوں میں ووٹنگ
صدارتی انتخاب کے لیے قومی اور صوبائی اسمبلیوں میں ووٹنگ کا عمل جاری ہے۔
اسلام آباد ہائی کورٹ کے چیف جسٹس عامر فاروق صدارتی انتخابات کے لیے قومی اسمبلی کے پریذائیڈنگ افسر ہیں۔
آصف علی زرداری کی پولنگ ایجنٹ سینیٹر شیری رحمان اور محمود خان اچکزئی کے پولنگ ایجنٹ سینیٹر سردار شفیق ترین ہیں۔
دونوں صدارتی امیدواران کے پولنگ ایجنٹس نے اپنے اپنے سرٹیفیکیٹس برائے تقرری پریذائڈنگ افسر کو جمع کرا دیے۔
صدارتی الیکشن کے آغاز پر ہی سنی اتحاد کونسل کے ارکان نے احتجاج کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صدارتی انتخابات میں سینیٹ اور قومی اسمبلی کے لیے چیف جسٹس اسلام آباد ہائی کورٹ اور پنجاب اسمبلی کے لیے الیکشن کمیشن کے ممبر نثار درانی کو پریذائیڈنگ افسر مقرر کیا گیا ہے۔
سندھ اسمبلی کے لیے چیف جسٹس سندھ ہائی کورٹ، خیبر پختونخوا اسمبلی کے لیے پشاور ہائی کورٹ کے چیف جسٹس اور بلوچستان اسمبلی کے لیے چیف جسٹس بلوچستان ہائی کورٹ پریذائیڈنگ افسر ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیراعظم شہباز شریف اور صدارتی امیدوار آصف علی زرداری ایوان پہنچ گئے ہیں۔
پاکستان پیپلز پارٹی کے چیئرمین بلاول بھٹو زرداری بھی پہنچ گئے ہیں۔
ارکان نے ڈیسک بجا کر آصف علی زرداری اور شہبازشریف کا استقبال کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان میں آج صدر کے انتخاب کے لیے پولنگ کا وقت شروع
مسلم لیگ ن اور پیپلز پارٹی سمیت دیگر جماعتوں پر مشتمل حکمراں اتحاد کے امیدوار اور سابق صدر آصف علی زرداری اور سنی اتحاد کونسل و پختونخوا ملی عوامی پارٹی کے نامزد امیدوار محمود خان اچکزئی کے درمیان مقابلہ ہو گا۔
پولنگ کا آغاز سنیچر کو صبح دس بجے شروع ہو گیا ہے۔ پارلیمنٹ ہاؤس اور چاروں صوبائی اسمبلیوں میں قائم پولنگ سٹیشنوں پر منتخب اراکین سہ پہر چار بجے تک اپنا حق رائے دہی استعمال کر سکیں گے۔
سینیٹ اور قومی اسمبلی کے اراکین پارلیمنٹ ہاؤس کے اسمبلی ہال میں اپنا ووٹ ڈالیں گے جبکہ چاروں صوبائی اسمبلیوں کے ارکان اپنی اپنی اسمبلی میں ووٹ کاسٹ کریں گے۔
صدارتی الیکشن میں ٹوٹل 696 الیکٹورل ووٹ ہیں۔ ان میں 336 قومی اسمبلی، 100 سینیٹ اور 65 ہر صوبائی اسمبلی کے ووٹ ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آصف زرداری بھاری اکثریت سے دوبارہ صدر منتخب ہوں گے، سید علی حیدر گیلانی
پنجاب اسمبلی میں پارلیمانی لیڈر پیپلز پارٹی سید علی حیدر گیلانی نے کہا ہے کہ آصف علی زرداری آج بھاری اکثریت سے دوبارہ صدر منتخب ہوں گے۔
انہوں نے کہا کہ آج صدر کے انتخاب میں سرپرائز ملے گا۔
’آصف علی زرداری وہ واحد شخص ہیں جنہوں نے پہلے بھی بطور صدر اپنے اختیارات پارلیمنٹ کو دیے۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الیکشن کمیشن کا عملہ پنجاب اسمبلی پہنچ گیا
صدارتی انتخاب کے لیے الیکشن کمیشن آف پاکستان کا عملہ پنجاب اسمبلی پہنچ گیا۔
صدارتی انتخاب کے لیے انتخابی مواد بھی پنجاب اسمبلی پہنچا دیا گیا۔
پنجاب اسمبلی میں رکن الیکشن کمیشن آف پاکستان نثار درانی پریذائیڈنگ افسر کے فرائض سرانجام دیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
