پاکستان کے وزیر خزانہ محمد اورنگزیب کی دبئی میں غیرملکی سرمایہ کاروں سے ملاقاتیں

پاکستان کے وفاقی وزیر خزانہ و محصولات محمد اورنگزیب نے دبئی میں غیرملکی سرمایہ کاروں سے ملاقاتیں کی ہیں۔

سرکاری خبر رساں ایجنسی ایسوی ایٹڈ پریس آف پاکستان (اے پی پی) کے مطابق یہ ملاقاتیں پیر کو ہوئی ہیں۔

وزیر خزانہ سے ملاقات کرنے والے سرمایہ کاروں میں آیانا ہولڈنگ کے چیئرمین عبداللہ بن لہیج اور محمد ہلال بن تراف المنصوری، چیئرمین ناد الشیبہ ہولڈنگ شامل تھے۔

بیان کے مطابق ان ملاقاتوں میں موجودہ اقتصادی شراکت داری کی حمایت کرتے ہوئے متحدہ عرب امارات اور پاکستان کے درمیان سرمایہ کاری کی سرگرمیوں کو بڑھانے کے طریقوں پر بات چیت ہوئی۔

گفتگو کے دوران انفارمیشن ٹیکنالوجی، قابل تجدید توانائی، ٹرانسپورٹ اور لاجسٹکس، انفرسٹرکچر اور ریئل اسٹیٹ کے شعبوں میں شراکت داری کے مواقع بھی زیرِبحث آئے۔

’اس موقعے پر پاکستان کے وزیر خزانہ محمد اورنگزیب نے سرمایہ کاروں کے لیے ہر مرحلے میں معاونت بشمول مارکیٹ ریسرچ، ریگولیٹری رہنمائی، سرمایہ کاری کی سہولت، سرمایہ کاری کے بعد کی مدد اور ایک خوشگوار تجربے کو یقینی بنانے میں خصوصی سرمایہ کاری سہولت کونسل (ایس آئی ایف سی) کے کردار سے متعلق گفتگو کی۔‘