ٹی20 ورلڈ کپ: دھمکی آمیز پیغامات کے بعد نیو یارک میں سکیورٹی کے سخت انتظامات

آئندہ ماہ سے امریکہ اور ویسٹ انڈیز میں شروع ہونے والے آئی سی سی ٹی20 ورلڈ کپ کے دوران سکیورٹی خدشات کے باعث نیو یارک میں میچوں کے لیے سکیورٹی کے غیر معمولی انتظامات کیے جا رہے ہیں۔

برطانوی خبر رساں ادارے روئٹرز کے مطابق نیو یارک کی گورنر نے بدھ کو بتایا کہ ٹی20 ورلڈ کپ کے لیے شہر کی سکیورٹی بڑھائے جائی گی۔

نیو یارک کے سٹیڈیم کی سکیورٹی بالخصوص پاکستان اور انڈیا کے میچ کے حوالے سے ملنے والے دھمکی آمیز پیغامات کی وجہ سے سخت کی جائے گی۔

گورنر نیو یارک کیتھی ہوچُل نے سماجی رابطوں کی ویب سائٹ ایکس (سابق ٹوئٹر) پر اپنی پوسٹ میں لکھا کہ ’کرکٹ ورلڈ کپ کی تیاریوں کے حوالے سے میری ٹیم فیڈرل اور قانون نافذ کرنے والے وفاقی اداروں کے ساتھ مل کر کام کر رہی ہے تاکہ تماشائی محفوظ رہیں۔‘

انہوں نے مزید لکھا کہ ’اس وقت سکیورٹی کے کوئی ٹھوس خدشات نہیں ہیں۔‘

اے بی سی نیوز کے مطابق نیو یارک پولیس ڈیپارٹمنٹ کا کہنا ہے کہ نیو یارک میں ہونے والے ٹورنامنٹ اور اس سے منسلک دیگر تقریبات میں شدت پسندوں کو پرتشدد کارروائیاں کرنے کا موقع مل سکتا ہے۔‘

نیو یارک پولیس کا کہنا ہے کہ ’داعش کے حامی پروپیگنڈا پاکستان اور انڈیا کے میچ کے حوالے سے خدشات کو بڑھاتا ہے۔‘

ناساؤ کاؤنٹی پولیس کمشنر  پیٹرک رائیڈر کہتے ہیں کہ ورلڈ کپ کے حوالے سے داعش خراسان گروپ کی جانب سے اپریل میں دھمکی بھیجی گئی اور پاکستان اور انڈیا کے میچ کے حوالے سے بالخصوص سکیورٹی خدشات ہیں۔
 

گورنر نیو یارک نے مزید بتایا کہ نیو یارک پولیس کو بھاری نفری تعینات کرنے، نگرانی  اور سکریننگ کرنے کی ہدایات جاری کی گئی ہیں۔

خیال رہے کہ ٹی20 ورلڈ کپ میں ویسٹ انڈیز اور امریکہ میں مجموعی طور پر 55 میچز کھیلے جائیں گے جن میں سے 16 میچز کی میزبانی امریکہ کے تین شہر کریں گے۔

امریکہ میں ہونے والے 16 میچز میں سے آٹھ میچ نیو یارک کے ناساؤ کاؤنٹی کرکٹ سٹیڈیم میں کھیلے جائیں گے جس میں 9 جون کو ہونے والا پاکستان اور انڈیا کا میچ بھی شامل ہے۔