منشیات فروشی کے خلاف کریک ڈاؤن جاری، متعدد سمگلرز گرفتار

مملکت میں منشیات فروشوں کے خلاف کریک ڈاؤن کا سلسلہ جاری ہے۔ قانون نافذ کرنے والے اداروں کی ٹیموں نے متعدد غیرملکیوں اور سعودی شہری کو منشیات فروشی کے الزام میں گرفتار کیا۔

اخبار 24 کے مطابق ریاض ریجن میں ادارہ اینٹی نارکوٹکس کی ٹیموں نے ایک ایتھوپی اور پاکستانی کو گرفتار کرکے ان کے قبضے سے 20 کلو گرام چرس برآمد کی ہے۔

جدہ میں بھی انسداد منشیات کی ٹیموں نے 3 پاکستانیوں کو گرفتار کیا جن کے قبضے سے 6 کلو چرس برآمد کی گئی۔ ینبع میں ایک سعودی شہری کو ساڑھے ساتھ کلو گرام چرس کے ساتھ حراست میں لیا گیا۔

سرحدی محافظوں نے جازان میں چار ایتھوپیوں کو گرفتار کیا جن کے قبضے سے نشہ آور پودے قات کے 80 بنڈل برآمد ہوئے۔ گرفتار شدگان کے خلاف منشیات اسمگلنگ کا مقدمہ درج کر کے انہیں متعلقہ عدالت کے سپرد کر دیا گیا ہے۔

واضح رہے کہ سعودی عرب میں بڑے پیمانے پر منشیات فروشی کے خلاف مہم کافی عرصے سے جاری ہے اس دوران متعدد افراد کو گرفتار کیا جا چکا ہے۔