اسرائیل کے رامات ڈیوڈ ایئربیس کو درجنوں میزائلوں سے نشانہ بنایا: حزب اللہ

حزب اللہ نے کہا ہے کہ اس نے اسرائیل کے رمات ڈیوڈ ایئربیس کو درجنوں میزائلوں سے نشانہ بنایا ہے۔

خبر رساں ادارے روئٹرز کے مطابق اتوار کی صبح حزب اللہ نے ٹیلی گرام چینل پر پوسٹ کیا کہ اس نے ’لبنان پر بار بار اسرائیلی حملوں‘ کے جواب میں کارروائی کی۔

دوسری جانب امریکی محکمہ خارجہ نے لبنان میں موجود امریکی شہریوں پر زور دیا ہے کہ وہ ملک چھوڑ دیں کیونکہ اسرائیل اور حزب اللہ کے درمیان تنازع بڑھ رہا ہے۔

محکمہ خارجہ نے ایک ایڈوائزری میں کہا ہے کہ اس وقت کم کمرشل پروازیں دستیاب ہیں اور اگر امن و امان کی صورتحال خراب ہوتی ہے تو لبنان سے نکلنے کے لیے کمرشل پروازیں دستیاب نہیں ہوں گی۔‘

اسرائیلی فوج نے سنیچر کو جنوبی لبنان پر درجنوں فضائی حملے کیے تھے جن میں سرحد سے 30 کلومیٹر دور جنگلات اور وادیوں کو نشانہ بنایا گیا۔

عرب نیوز کے مطابق اسرائیلی جاسوس طیاروں نے بیروت، اس کے مضافات اور لبنان کے دیگر مختلف علاقوں میں نچلی پرواز کی اور انتہائی شمال میں ہرمل تک پہنچے۔

محکمہ صحت کے مطابق 11 اور 12 ستمبر کو لبنان میں عوامی مقامات پر پیجرز اور واکی ٹاکیز کے دھماکوں میں کم سے کم 37 افراد ہلاک اور تین ہزار سے زیادہ زخمی ہو گئے تھے۔

حزب اللہ نے ان دھماکوں کا ذمہ دار اسرائیل کو ٹھہرایا تھا لیکن ابھی تک اسرائیلی حکومت نے ان حملوں پر براہ راست کوئی تبصرہ نہیں کیا۔