عمرہ پرمٹ کے مقررہ وقت سے کتنے گھنٹے پہلے مکہ پہنچنا چاہیے؟
وزارت کا کہنا ہے پرمٹ کا مقصد ازدحام سے زائرین کو بچانا ہے۔( فائل فوٹو: ایس پی اے)
سعودی وزارت حج نے عمرہ زائرین کے لیے پرمٹ کے حصول پر زوردیتے ہوئے کہا ہے کہ اس کا مقصد عمرہ مناسک کی ادائیگی میں سہولت ہے۔
سبق نیوز کے مطابق وزارت کا کہنا ہے’ عمرہ پرمٹ کے وقت مقررہ سے چار گھنٹے قبل مکہ مکرمہ میں داخل ہونا چاہئے‘۔
عمرہ زائرین کو اگر یہ اندیشہ ہو کہ وہ پرمٹ کے وقت پر مکہ نہیں پہنچ سکتے تو انہیں چاہئے کہ وہ اپنا پرمٹ کینسل کرانے کے بعد دوبارہ اپنی آسانی کو مدنظر رکھتے ہوئے جاری کرالیں۔
وزارت حج نے عمرہ پرمٹ کے حوالے سے کہا کہ پرمٹ کا مقصد ازدحام سے زائرین کو بچانا ہے۔
ڈیجیٹل ایپ کے ذریعے اس وقت کا انتخاب کیا جاسکتا ہے جب مسجد الحرام میں رش نہ ہو اور آرام سے مناسک عمرہ ادا ہوسکیں۔
زائرین کو چاہئے کہ وہ اپنا عمرہ پرمٹ مسجد الحرام کی انتظامیہ کے طلب کرنے پر پیش کریں۔
