اسلام آباد شرپسندوں سے آج ہی خالی کروایا جائے گا: آئی جی اسلام آباد

یہ لائیو پیج اب مزید اپ ڈیٹ نہیں ہو رہا ہے

اسلام آباد شرپسندوں سے آج ہی خالی کروایا جائے گا: آئی جی اسلام آباد

آئی جی اسلام آباد علی ناصر رضوی نے کہا ہے کہ شرپسندوں سے اسلام آباد آج ہی خالی کروایا جائے گا۔

آئی جی اسلام آباد نے سکیورٹی فورسز کے تازہ دم دستے ڈی چوک بھیج  دیے ہیں۔

راولپنڈی ڈویژن کی تمام نفری اسلام آباد طلب کر لی گئی ہے۔ آئی جی پنجاب، سی پی او راولپنڈی ،ڈی پی او اٹک سمیت اہم افسران کو بھی طلب کیا گیا ہے۔

دوسری جانب اسلام آباد انتظامیہ نے ملحقہ سیکٹرز میں مارکیٹیں بند کرانا شروع کر دی ہیں۔

منگل شام 6 بج کر 40 منٹ

پی ٹی آئی کا احتجاج، ڈی چوک میں اس وقت کیا ہو رہا ہے؟

قانون نافذ کرنے والے اداروں نے ڈی چوک کا کنٹرول سنبھال لیا ہے۔

وزیراعلٰی علی امین گنڈا پور اور عمران خان کی اہلیہ کا کنٹینر ابھی ڈی چوک تک نہیں پہنچا۔ پولیس کی جانب سے کنٹینر کو سیونتھ ایونیو کی جانب دھکیل دیا گیا ہے۔

پی ٹی آئی کارکنوں نے عمران خان کی اہلیہ اور وزیراعلیٰ علی امین گنڈاپور کے بغیر آگے بڑھنے سے انکار کر دیا ہے۔

پی ٹی آئی کے کارکنان نے ڈی چوک سے کنٹینر ہٹانے کی کوشش کی تھی جس کے بعد پولیس نے علاقہ خالی کرا لیا اور اس وقت وقفے وقفے سے فائرنگ کی آوازیں سُنی جا رہی ہیں۔

منگل شام 6 بج کر 25 منٹ

جو اب تک نہیں پہنچ پائے وہ بھی ڈی چوک پہنچیں: عمران خان

سابق وزیراعظم عمران خان نے اڈیالہ جیل سے اپنے پیغام میں کہا ہے کہ ’پاکستانی قوم اور تحریک انصاف کے کارکنان کو سلام جو ملک پر مسلط مافیا کے سامنے اپنے مطالبات اور حقیقی آزادی کے لیے ڈٹ کر کھڑے ہیں۔‘

پی ٹی آئی کی جانب سے بتایا گیا ہے کہ عمران خان نے اپنے پیغام میں کہا ہے کہ ’میرا اپنی ٹیم کو بھی پیغام ہے کہ آخری بال تک لڑیں، جب تک ہمارے مطالبات پورے نہیں ہوتے ہم پیچھے نہیں ہٹیں گے۔‘

انہوں نے کہا کہ ’محسن نقوی کی ہدایات پر رینجرز اور پولیس نے ہمارے ورکرز پر فائرنگ اور شیلنگ کر کے پُرامن شہریوں کو شہید اور زخمی کیا، انہیں اس کا حساب دینا ہو گا۔‘

عمران خان نے کہا کہ ’مجھے ملٹری کورٹ میں ٹرائل کی دھمکیاں دینے والوں کے لیے پیغام ہے کہ جو کرنا ہے کر لو میں اپنے مؤقف سے پیچھے نہیں ہٹوں گا۔‘

تحریک انصاف کے بانی نے کارکنان کو ہدایت کی کہ ’جو اب تک نہیں پہنچ پائے وہ بھی ڈی چوک پہنچیں۔ یہ پاکستان کی بقا اور حقیقی آزادی کی جدوجہد ہے۔‘

منگل شام 6 بج کر 14 منٹ

مظاہرے میں جان سے جانے والے3 رینجرز اہلکاروں کی نمازِ جنازہ ادا

پاک فوج کے شعبہ تعلقات عامہ (آئی ایس پی آر) کا کہنا ہے کہ ’اسلام آباد میں مظاہرے کے دوران شہید رینجرز کے جوانوں کی نماز جنازہ ادا کر دی گئی ہے۔‘

آئی ایس پی آر کے مطابق ’شہید رینجرز اہلکاروں کی نماز جنازہ  چکلالہ گیریژن راولپنڈی میں ادا کی گئی۔‘

 نمازجنازہ میں وزیراعظم شہبازشریف، نائب وزیراعظم اسحاق ڈار اور آرمی چیف جنرل سید عاصم منیر نے شرکت کی۔

اس موقع پر وزیراعظم شہباز شریف کا کہنا تھا کہ ’سیاسی مفادات کے حصول کے لیے پاکستان کسی فساد اور خونریزی کا متحمل نہیں ہو سکتا۔‘

منگل شام 5 بج کر 56 منٹ

عمران خان کی جلد رہائی کے لیے بہت پُرامید ہیں: بیرسٹر گوہر

تحریک انصاف کے چیئرمین بیرسٹر گوہر علی خان نے کہا ہے کہ ’حکومت سے مطالبہ کیا ہے کہ بےگناہ لوگوں پر فائرنگ کرنے سے باز رہے۔‘

ایکس پر اپنے پیغام میں بیرسٹر گوہر نے لکھا کہ ’ہم عمران خان کی جلد رہائی کے لیے بہت پُرامید ہیں۔‘

انہوں نے مزید کہا کہ ’پی ٹی آئی اور سپورٹر اپنی جدوجہد میں پُرامن رہیں۔‘

منگل شام 5 بج کر 50 منٹ

رینجرز کی ہلاکت، سوشل میڈیا پر پروپیگنڈا کیا جا رہا ہے: ترجمان

پاکستان رینجرز کی جانب سے جاری ہونے والے ایک بیان میں کہا گیا ہے کہ پیر کی شب اسلام آباد میں رینجرز کی ہلاکت کے بارے میں سوشل میڈیا پر پروپیگنڈا کیا جا رہا ہے۔

ترجمان رینجرز کا کہنا ہے کہ ’کہا جا رہا ہے کہ رینجرز اہلکار سکیورٹی فورسز کی گاڑی کی تیز رفتاری کی وجہ سے مارے گئے جو کہ پروپیگنڈے کے سوا کچھ نہیں۔‘

بیان میں مزید کہا گیا ہے کہ ’اس حادثے میں رینجرز کے تین اہلکار ہلاک ہوئے جبکہ ایک کی حالت تشویشناک ہے۔‘

منگل سہ پہر 4 بج کر 53 منٹ

پولیس نے ڈی چوک خالی کرا لیا، جناح ایونیو پر شیلنگ

پولیس نے ڈی چوک کو مکمل خالی کرا لیا ہے اور مظاہرین کو ارجینٹینا پارک کی جانب دھکیل دیا ہے۔

مظاہرین نے ڈی چوک سے کنٹینرز ہٹانے کی کوشش کر رہے تھے جس پر پولیس کی جانب سے شیلنگ کر کے انہیں روکنے کی کوشش کی گئی۔

اُدھر جناح ایونیو پر بھی پولیس کی جانب سے آنسو گیس کی شیلنگ کر کے مظاہرین کو منتشر کرنے کی کوشش کی جا رہی ہے۔

منگل سہ پہر 4 بج کر 45 منٹ

ہکلہ انٹرچینج کے قریب پولیس کانسٹیبل کی ہلاکت کا مقدمہ درج

ہکلہ انٹرچینج کے قریب پولیس کانسٹیبل کی ہلاکت کا مقدمہ تحریک انصاف کی قیادت کے خلاف درج کر لیا گیا ہے۔

تھانہ ٹیکسلا میں درج مقدمے میں بانی پی ٹی آئی عمران خان، وزیراعلیٰ خیبر پختونخوا علی امین گنڈاپور، سالار خان کاکڑ، شاہد خٹک کو نامزد کیا گیا ہے۔

مقدمے میں تعزیراتِ پاکستان کی دفعہ 14 اور انسداد دہشت گردی ایکٹ کی دفعات بھی شامل کی گئی ہیں۔

منگل سہ پہر 4 بج کر 12 منٹ

مظاہرین کی ڈی چوک سے کنٹینر ہٹانے کی کوشش، پولیس کی شیلنگ

تحریک انصاف کے مظاہرین ڈی چوک سے کنٹینر ہٹانے کی کوشش کر رہے ہیں۔ پولیس کی جانب سے مظاہرین کو مزید پیش قدمی سے روکنے کے لیے ایک بار پھر شیلنگ کی جا رہی ہے۔

خیبرپختونخوا کے وزیراعلیٰ علی امین گنڈاپور نے کارکنوں سے خطاب میں یہ واضح کیا تھا کہ ’ڈی چوک سے آگے ہم نے نہیں جانا جب تک عمران خان کے احکامات نہیں آتے۔‘

منگل سہ پہر 4 بج کر 9 منٹ

28 ستمبر کا کیس، عمران خان کے جسمانی ریمانڈ میں چھ روز کی توسیع

راولپنڈی کی انسداد دہشت گردی کی عدالت نے 28 ستمبر کے مقدمے میں سابق وزیراعظم عمران خان کے جسمانی ریمانڈ میں چھ روز کی توسیع کر دی ہے۔

انسداد دہشتگردی عدالت نے تحریک انصاف کے بانی عمران خان کے خلاف 28 ستمبر کو راولپنڈی میں احتجاج پر اُکسانے کے کیس کی سماعت کی۔

واضح رہے کہ عمران خان کے خلاف 28 ستمبر کو راولپنڈی میں احتجاج پر اُکسانے کا مقدمہ درج ہے جس میں توشہ خانہ ٹو سے ضمانت ملنے کے بعد ان کی گرفتاری کا اندراج کیا گیا تھا۔

منگل دوپہر دو بج کر47 منٹ

’ڈی چوک مطلب ڈی چوکُ، پی ٹی آئی کا ڈی چوک میں دھرنے کا اعلان

وزیراعلیٰ خیبرپختونخوا علی امین گنڈاپور نے مطالبات کی منظوری تک ڈی چوک میں دھرنے کا اعلان کر دیا ہے۔

کارکنوں سے خطاب میں علی امین گنڈاپور نے کہا ہے کہ ’ڈی چوک مطلب ڈی چوک، جب تک عمران خان کا حکم نہیں ہو گا واپس نہیں جائیں گے۔‘

انہوں نے کہا کہ ’جب تک مطالبات پورے نہیں ہو جاتے، دھرنا جاری رکھیں گے۔‘

منگل دوپہر دو بج کر 45 منٹ

’بشریٰ بی بی فرنٹ لائن پر آئیں، ڈی چوک کیوں نہیں پہنچتیں‘: عطا تارڑ

وفاقی وزیر اطلاعات عطا اللہ تارڑ نے کہا ہے کہ ’آئیں نا بشریٰ بی بی فرنٹ لائن پر آئیں، خود ڈی چوک کیوں نہیں پہنچتیں۔ پیچھے کیوں چُھپی ہیں۔ غریب کے بچوں کو ڈھال کیوں بنایا ہوا ہے۔‘

اسلام آباد میں میڈیا سے گفتگو کرتے ہوئے وزیر اطلاعات عطا اللہ تارڑ نے کہا کہ ’ریاست کا صبر کا پیمانہ لبریز ہوتا ہے تو نتائج بھیانک ہوتے ہیں۔ ہمیں مجبور نہ کریں ورنہ ہم آپ کے خلاف آخری حد تک جائیں گے۔‘

انہوں نے مزید کہا کہ ابھی بھی وقت ہے باز آ جائیں اور واپس چلے جائیں۔‘

منگل دوپہر دو بج کر 15 منٹ

ڈی چوک کے اطراف کی تازہ ترین صورتحال کیا ہے؟

ڈی چوک اور پولی کلینک چوک کے قریب ہوائی فائرنگ کی آوازیں سنائی دے رہی ہیں۔ عینی شاہدین کے مطابق مظاہرین نے پولی کلینک چوک اور بلیو ایریا میں چائنا چوک پر قانون نافذ کرنے والے اداروں کو پیچھے دھکیل دیا ہے۔

آنسو گیس کا اثر زیرو پوائنٹ سے لے کر سیکٹرز ایف سیون اور ایف ایٹ تک محسوس کیا جا رہا ہے۔ جی سیون اور جی ایٹ سیکٹرز میں شدید شیلنگ کی جا رہی ہے۔

بلیو ایریا مکمل طور پر بند ہے جبکہ غیر متوقع راستوں کی بندش سے عوام کو شدید مشکلات کا سامنا ہے۔ انٹرنیٹ اور موبائل سروس معطل ہونے کی وجہ سے رابطے میں رُکاوٹ پیش آ رہی ہے۔

اہم نکات:

منگل دوپہر 1 بج کر 50 منٹ

پی ٹی آئی کے مظاہرین ڈی چوک کے قریب پہنچ گئے

تحریک انصاف کے مظاہرین ڈی چوک کے قریب پہنچ گئے ہیں جہاں پولیس کی جانب سے انہیں روکنے کے لیے شیلنگ کی جا رہی ہے۔

اُدھر وزیراعلیٰ خیبرپختونخوا علی امین گنڈاپور اور سابق وزیراعظم کی اہلیہ کی قیادت میں پی ٹی آئی کا مرکزی قافلہ جناح ایونیو پہنچ چکا ہے۔

منگل دوپہر 1 بج کر 28 منٹ

پی ٹی آئی کا قافلہ بلیو ایریا پہنچ گیا، پولیس کی شیلنگ

تحریک انصاف کا مرکزی قافلہ اس وقت اسلام آباد کے علاقے بلیو ایریا میں موجود ہے جس کے آخر میں ڈی چوک واقع ہے۔

پولیس کی جانب سے مظاہرین پر شیلنگ کی جا رہی ہے جبکہ رینجرز کی طرف سے بھی ربڑ کی گولیوں کا استعمال کیا جا رہا ہے۔

منگل دوپہر 1 بج کر 5 منٹ

خفیہ ہاتھ کے ارادے کچھ اور، ان کے ساتھ ہاتھ ہو جائے گا: محسن نقوی

وفاقی وزیر داخلہ محسن نقوی کا کہنا ہے کہ ’پی ٹی آئی قیادت ہم سے بات کرنا چاہتی ہے مگر فساد کی جڑ خفیہ ہاتھ ہے۔‘

اسلام آباد میں میڈیا سے گفتگو کرتے ہوئے وزیر داخلہ محسن نقوی نے کہا کہ ’کیا سنجانی جانے کا فیصلہ نہیں ہوا تھا؟ لیکن اس وقت پیچھے ایک خفیہ قیادت ہے جس کے سامنے ان کی پوری قیادت زیرو ہے۔‘

انہوں نے کہا کہ ’ایک چیز سب پر بھاری ہے، مجھے نہیں پتہ اس نے کب ٹیک اوور کرنا ہے۔ خفیہ ہاتھ کے ارادے کچھ اور ہیں، ان کے ساتھ ہاتھ ہو جائے گا۔‘

’مظاہرین کو آنسو گیس کے شیل خیبرپختونخوا حکومت نے فراہم کیے‘

وزیر داخلہ نے کہا کہ ’ان کا سارا قافلہ خیبرپختونخوا سے آیا ہے۔ پنجاب سے ایک بندہ بھی نظر نہیں آئے گا۔ دو ہزار کے قریب بندہ تربیت یافتہ ہے جن کا بیک گراؤنڈ ہم نے چیک کرا لیا ہے۔‘

وفاقی وزیر داخلہ نے الزام عائد کیا کہ ’آنسو گیس کا شیل کس کو مل سکتا ہے، ساڑھے چار ہزار کا ایک شیل آتا ہے۔ ہزاروں میں جو شیل چلے ہیں یہ کہاں سے آئے ہیں یہ خیبرپختونخوا حکومت نے انہیں فراہم کیے ہیں۔‘

ان کا مزید کہنا تھا کہ ’حکومت کسی صورت جانی نقصان نہیں چاہتی۔ مظاہرین سے نمٹنے کے لیے پولیس کو مکمل اختیار دے دیا ہے۔‘

 منگل دوپہر 12: بج کر 35 منٹ

پی ٹی آئی کا احتجاج، رینجرز کے تین اور پولیس کے دو اہلکار جان سے گئے

سکیورٹی ذرائع کا کہنا ہے کہ ’تحریک انصاف کے احتجاج کے دوران پُرتشدد کارروائیوں میں رینجرز کے تین جبکہ پنجاب پولیس کے دو اہلکار جان سے گئے۔‘

سکیورٹی ذرائع نے بتایا کہ رینجرز کے پانچ جبکہ پنجاب پولیس کے 119 اہلکار زخمی ہیں۔ پی ٹی آئی کارکنان نے سرکاری املاک پہ حملے کیے اور ناقابل تلافی نقصان پہنچایا۔‘

’پرتشدد کاروائیوں کے باعث اسلام آباد پولیس کے 11 اہلکار شدید زخمی ہیں۔ مظاہرین کے حملوں سے پنجاب پولیس کی 22 گاڑیوں کو نقصان پہنچا۔‘

منگل دوپہر 12 بج کر 20 منٹ

تحریک انصاف کے احتجاج میں اب تک کیا ہوا؟

• تحریک انصاف کے احتجاجی  قافلے کی ڈی چوک کی جانب پیش قدمی جاری ہے۔ زیرو پوائنٹ پر کارکنان کو روکنے کے لیے پولیس کی جانب سے شیلنگ کی جا رہی ہے۔

• سری نگر ہائی وے پر رات گئے رینجرز کے تین اہلکاروں کو گاڑی تلے کچلے جانے کے بعد اسلام آباد میں فوج کو طلب کر لیا گیا ہے۔ 

• وفاقی وزیر داخلہ محسن نقوی نے کہا ہے کہ ’ہم نے پی ٹی آئی کو کہا تھا کہ وہ سنگ جانی چلے جائیں۔ انہیں بتایا ہے کہ ریڈ لائن عبور نہ کریں کہ ہمیں کوئی انتہائی قدم اٹھانا پڑے۔‘

• پنجاب بھر میں منگل سے جمعرات تک تین دن کے لیے دفعہ 144 نافذ ہے۔

منگل صبح 11 بج کر 54 منٹ

‏پی ٹی آئی کے احتجاج کے باعث جیل میں کیس کی سماعتیں بھی متاثر

اسلام آباد کی احتساب عدالت نے 190 ملین پاؤنڈ کیس کی سماعت بغیر کارروائی کے 28 نومبر تک ملتوی کر دی ہے۔

احتساب عدالت کے جج ناصر جاوید رانا نے اڈیالہ جیل کے بجائے اسلام آباد جوڈیشل کمپلیکس میں ہی سماعت کی۔

‏اڈیالہ جیل میں آج سماعت کے لیے مقرر توشہ خانہ ٹو کیس بھی بغیر کارروائی 29 نومبر تک ملتوی کر دیا گیا ہے۔

سپیشل جج سینٹرل نے سابق وزیراعظم عمران خان اور ان کی اہلیہ بشریٰ بی بی پر فردِ جرم کی آج تاریخ مقرر کر رکھی تھی۔

منگل صبح 11 بج کر 33 منٹ

زیرو پوائنٹ پر پولیس کی مظاہرین پر شیلنگ

تحریک انصاف کے احتجاجی قافلے کی ڈی چوک کی جانب پیش قدمی جاری ہے۔ اس وقت تحریک انصاف کا قافلہ اسلام آباد میں زیرو پوائنٹ انٹرچینج کراس کرتے ہوئے جناح ایونیو کی طرف مارچ کر رہا ہے۔

کارکنوں کو روکنے کے لیے پولیس کی جانب سے ایک بار پھر شیلنگ کی جا رہی ہے۔ دوسری جانب ڈی چوک پر سکیورٹی اہلکاروں کو الرٹ کر دیا گیا ہے۔

منگل صبح 9 بج کر 49 منٹ

انتشاری ٹولہ انقلاب نہیں، خونریزی چاہتا ہے: وزیراعظم

وزیراعظم شہباز شریف نے سری نگر ہائی وے پر مظاہرین کی جانب سے رینجرز اور پولیس اہلکاروں پر حملے کی شدید الفاظ میں مذمت کرتے ہوئے کہا ہے کہ ’انتشاری ٹولہ قانون نافذ کرنے والے اداروں کو دانستہ طور پر نشانہ بنا رہا ہے۔‘

 وزیراعظم ہاؤس کے میڈیا ونگ سے جاری ہونے والے بیان کے مطابق وزیراعظم شہباز شریف نے حملے میں گاڑی سے کچلے گئے رینجرز اہلکاروں کی شہادت پر گہرے دکھ اور غم کا اظہار کیا ہے۔

وزیرِ اعظم نے واقعے میں ملوث افراد کی فوری نشاندہی کرکے انہیں قرار واقعی سزا دلوانے کی ہدایت کی ہے۔ ان کا کہنا تھا کہ ’انتشاری ٹولہ انقلاب نہیں، خونریزی چاہتا ہے۔ یہ پُرامن احتجاج نہیں، شدّت پسندی ہے۔‘