سعودی عرب کی ماگڈے برگ حملے کی مذمت،متاثرین سے اظہار افسوس

سعودی عرب نے جرمنی کے شہر ماگڈے برگ کی کرسمس مارکیٹ پر ہونے والے حملے کی مذمت کی ہے۔

عرب نیوز کے مطابق جمعے کی شام کو ایک شخص نے کرسمس مارکیٹ میں ہجوم پر گاڑی چڑھا دی تھی جس کے نتیجے میں پانچ افراد ہلاک اور 200 سے زائد زخمی ہو گئے۔

حکام کے مطابق اس واقعے کے فوری بعد ڈرائیور کو موقعے سے گرفتار کر لیا گیا۔

سعودی وزارت خارجہ نے سنیچر کو ایک بیان میں متاثرین کے اہل خانہ اور حکومت سے تعزیت اور ہمدردی کا اظہار کرتے ہوئے زخمیوں کی جلد صحت یابی کی خواہش کا اظہار کیا ہے۔

سعودی عرب نے ہر قسم کے تشدد کے خلاف اپنے مضبوط موقف کا اعادہ بھی کیا۔

ایک سعودی اہلکار نے برطانوی خبر رساں ادارے روئٹرز کو بتایا کہ سعودی عرب نے حملہ آور کے اپنے ذاتی ’ایکس‘ اکاؤنٹ پر انتہا پسندانہ خیالات، جس سے امن و سلامتی کو خطرہ ہے، پوسٹ کرنے کے بعد جرمن حکام کو اس کے بارے میں خبردار کیا تھا۔

مسلم ورلڈ لیگ نے بھی اس حملے کی مذمت کرتے ہوئے تشدد اور ہر قسم کی دہشت گردی کے خلاف اپنے موقف کا اعادہ کیا۔

ایک بیان میں مسلم ورلڈ لیگ نے ’متاثرین اور زخمیوں کے خاندانوں کے ساتھ ساتھ جرمن کمیونٹی سے یکجہتی، دلی تعزیت اور ہمدردی کا اظہار کیا ہے۔‘