ڈونلڈ ٹرمپ کی کینیڈا کے خلاف اقتصادی طاقت استعمال کرنے کی دھمکی

نومنتخب امریکی صدر ڈونلڈ ٹرمپ نے کینیڈا کے خلاف اقتصادی طاقت استعمال کرنے کے عزم کا اظہار کیا ہے کیونکہ وہ کینیڈا کو امریکہ میں ضم کرنے کے اپنے منصوبے پر عمل پیرا ہیں۔

فرانسیسی نیوز ایجنسی اے ایف پی کے مطابق منگل کو یہ پوچھے جانے پر کہ کیا وہ فوجی طاقت استعمال کریں گے تو انہوں نے کہا کہ ’نہیں، اقتصادی طاقت۔‘

ان کا کہنا تھا کہ "کینیڈا اور امریکہ دونوں مل کر واقعی بہت کچھ ہوں گے۔ آپ اس مصنوعی طور پر کھینچی گئی لکیر سے چھٹکارا پائیں گے اور آپ اس پر ایک نظر ڈالیں کہ یہ کیسا لگتا ہے۔ اور یہ قومی سلامتی کے لیے بھی بہت بہتر ہوگا۔‘

خیال رہے کہ پیر کو ڈونلڈ ٹرمپ نے امریکی کی شمالی پڑوسی ملک کینیڈا کو امریکہ کی 51ویں ریاست بنانے کی خواہش کو دہرایا تھا۔

78 سالہ ٹرمپ نے کینیڈا کو امریکہ کی 51ویں ریاست بنانے کا خیال اسی وقت سے پیش کرنا شروع کیا جب انہوں نے پانچ نومبر کو اپنی انتخابی کامیابی کے بعد وزیراعظم ٹروڈو سے ملاقات کی تھی۔

ڈونلڈ ٹرمپ اپنی متعدد سوشل میڈیا پوسٹس میں اپنی اس خواہش کا ذکر کر چکے ہیں۔

ٹرمپ نے اپنے ذاتی پلیٹ فارم ’ٹروتھ سوشل‘ پر پیر کو شیئر کی گئی پوسٹ میں لکھا کہ ’کینیڈا میں بہت سے لوگ 51ویں ریاست بننا پسند کرتے ہیں۔‘

’امریکہ مزید تجارتی خسارے اور سبسڈی برداشت نہیں کر سکتا جو کینیڈا کو چلتے رہنے کے لیے درکار ہے۔ جسٹن ٹروڈو کو اس کا علم تھا اور اسی وجہ سے انہوں نے استعفیٰ دیا۔‘

نو منتخب صدر نے مزید کہا کہ ’اگر کینیڈا امریکہ میں ضم ہو جائے تو کوئی ٹیرف نہیں ہوں گے، ٹیکس بہت کم ہو جائیں گے اور وہ روسی اور چینی جہازوں کے خطرے سے مکمل طور پر محفوظ ہوں گے جو انہیں مستقل طور پر گھیرے ہوئے ہیں۔ (امریکہ اور کینیڈا) ساتھ مل کر یہ کتنا عظیم ملک ہو گا۔‘

کینیڈا کا ٹرمپ کی اس تجویز پر تاحال کوئی سرکاری ردعمل سامنے نہیں آیا۔