پاکستانی بحریہ کے جہاز یمامہ کا دورہ جدہ اور دو طرفہ مشق میں شرکت

پاکستانی بحریہ کے نئے کمیشن شدہ جہاز یمامہ نے رومانیہ سے پاکستان کے لیے سفر کے دوران جدہ، سعودی عرب کا دورہ کیا اور رائل سعودی نیول فورسز ‏(RSNF)  کے جہاز کے ساتھ دو طرفہ مشق میں حصہ لیا۔

ڈائریکٹر پبلک ریلیشن پاکستان نیوی کی جانب سے جاری بیان کے مطابق جدہ بندرگاہ پہنچنے پر رائل سعودی نیول فورسز کے اعلیٰ حکام اور پاکستانی سفارتخانے کے نمائندگان نے جہاز کا پرتپاک استقبال کیا۔

 بندرگاہ پر قیام کے دوران جہاز کے عملے نے پیشہ ورانہ سرگرمیوں میں حصہ لیا جن میں جہازوں کے دو طرفہ دورے، بحری امور پر بات چیت اور بحری قیادت کے ساتھ ملاقاتیں شامل تھیں۔

بندرگاہ کا دورہ مکمل ہونے پر رائل سعودی نیول فورسز کے جہاز ایچ ایم ایس مکہ کے ساتھ بحری مشق کا انعقاد کیا گیا۔ مشق کا مقصد دونوں بحری افواج کے درمیان باہمی تعاون کو بڑھانا تھا۔

بیان کے مطابق پی این ایس یمامہ کے دورہ سعودی عرب اور دو طرفہ مشقوں میں شرکت سے دونوں ممالک کے درمیان موجود برادرانہ تعلقات اور دفاعی تعاون مزید مستحکم ہوں گے۔