پاکستان بحریہ اور رائل سعودی نیول فورسز کی مشترکہ مشق ’افعی الساحل‘ اختتام پذیر

پاکستان بحریہ اور رائل سعودی نیول فورسز کی سپیشل آپریشن فورسز کے مابین مشترکہ مشق افعی الساحل کراچی میں اختتام پذیر ہو گئی ہیں۔

بدھ کو پاکستان کی فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق کمانڈر کوسٹ ریئر ایڈمرل فیصل امین نے دونوں بحری افواج کے اعلٰی حکام کے ہمراہ آخری ٹیسٹ مشق کا مظاہرہ دیکھا۔

مشق کے دوران رائل سعودی بحریہ اور پاکستان بحریہ کے سپیشل آپریشن فورسز کی ٹیموں نے مشترکہ تربیتی آپریشنز میں حصہ لیا ہے۔

بیان کے مطابق تربیتی مشقوں میں آر پی جی فائرنگ، مشین گن فائرنگ، کلوز کوارٹرز کمبیٹ، پریکٹیکل ریپیلینگ، ہوسٹیج ریسکیو، وی بی ایس ایس، ای او ڈی ڈرل، مشن پلاننگ اور ایریا کلیئرنس کے جدید طریقہ کار شامل تھے۔

اس مشترکہ مشق کا مقصد دونوں بحری افواج کے مابین ہم آہنگی اور حکمت عملی کی مہارت کو بڑھانا تھا۔ 

آئی ایس پی آر کا کہنا ہے کہ یہ مشق میری ٹائم سکیورٹی چیلنجز سے نمٹنے کے لیے باہمی صلاحیتوں اور ہم آہنگی کو بڑھانے میں معاون ثابت ہوگی۔