روزانہ مطالعہ سے زندگی کا دورانیہ کئی برس بڑھ سکتا ہے

 امریکہ کے ماہرین صحت کا کہنا ہے کہ روزانہ مطالعے کی عادت زندگی میں کئی برس کا اضافہ کا سبب بن سکتی ہے ۔نجی ٹی وی چینل کے مطابق یلے یونیورسٹی نیو ہیون کے ماہرین کی جانب سے 12سالہ طویل مطالعے میں50 سال سے زائد عمر کے 3 ہزار افراد کو شامل کیا گیا اور تحقیق سے معلوم ہوا کہ ہفتے میں ساڑھے 3 گھنٹے تک کتاب کا مطالعہ کرنے والے افراد میں اس دوران موت کا خطرہ 23 فیصد تک کم ہوگیا۔ماہرین نے تحقیق میں شامل افراد سے ان کی صحت اورمطالعے کی عادت کے بارے میں بھی پوچھا اور لوگوں کو تین گروپوں میں تقسیم کیا گیا،پہلا گروہ ان افراد پر مشتمل تھا جو مطالعہ نہیں کرتا تھا،دوسرے گروہ میں ہفتے میں ساڑھے 3 گھنٹے تک مطالعہ کرنے والے افراد اور تیسرے گروہ میں اس سے زیادہ وقت تک پڑھنے والے قارئین شامل تھے جن میں زیادہ تعداد خواتین کی تھی۔تحقیق میں انکشاف ہوا کہ جن افراد نے ہفتے میں ساڑھے 3 گھنٹے مطالعے میں گزارے وہ کتاب نہ پڑھنے والوں کے مقابلے میں 23 ماہ یعنی 2 سال زیادہ زندہ رہے۔ماہرین کے مطابق ناول کی جگہ اخبارات،رسائل اور جرائد پڑھنے والوں پر بھی اس کا اثر ہوتا ہے لیکن اتنا زیادہ مضبوط نہیں ہوتا،ماہرین کا کہنا ہے کہ روزانہ نصف گھنٹہ تک کتاب پڑھنے سے عمرطویل ہو سکتی ہے-