سعودی فلم فیسٹیول کے گیارہویں ایڈیشن کی تیاریاں مکمل

کنگ عبدالعزیز سینٹر فار ورلڈ کلچر’ اثرا سنٹر‘  میں پریس کانفرنس کے دوران بتایا گیا ہے ’سعودی فلم فیسٹیول17 سے 23 اپریل تک گیارہویں ایڈیشن کے انعقاد کی تیاریاں کر رہا ہے۔‘

عرب نیوز کے مطابق فلم فیسٹیول کے ڈائریکٹر احمد الملا  نے اسے ایونٹ کو فلم سازوں کے لیے اہم پلیٹ فارم قرار دیتے ہوئے کہا یہ فیسٹیول فلم انڈسٹری میں کامیاب پروڈکشن کو فروغ دیتا ہے۔

اس تقریب کے ذریعے فلمی دنیا سے تعلق رکھنے والے ماہرین اور شائقین کے مابین تبادلہ خیال کا موقع فراہم کرتا ہے۔

فلم فیسٹیول میں انفرادی، قومی اور ثقافتی شناخت کی عکاسی اور تشکیل کی جاتی ہے جس میں سعودی عرب، خلیج عراق اور یمن  کے علاوہ دیگر ممالک سے 68  فلمیں پیش کی جائیں گی۔

تین دہائیوں تک تھیٹر، ٹیلی ویژن اور سینما میں نمایاں خدمات انجام دینے والے معروف سعودی اداکار ابراہیم الحساوی کو فلم فیسٹیول کے دوران خصوصی ایوارڈ سے نوازا جائے گا۔

سعودی اداکار ابراہیم الحساوی کے مشہور  ڈراموں میں ’طاش ما طاش، بینی و بینک کے علاوہ ھجان ، زیرو ڈسٹنس اور ہبل فلمیں شامل ہیں۔

رواں سال کے فلم فیسٹیول میں شامل ہونے والی فلموں میں سعودی اور خلیجی 7 فیچر فلمیں،22 مختصر فکشن فلمیں،7 دستاویزی فلمیں،12 سعودی پروڈکشنز کی متوازی سکریننگزشامل ہوں گی۔

فیسٹیول میں فلم انڈسٹری سے متعلق علمی و عملی سرگرمیاں بھی شامل کی جائیں گی جن میں 4 پینل مباحثے، 4 جدید ماسٹرکلاسز،3 سعودی سنیما انسائیکلوپیڈیا کی کتابوں کے دستخطی سیشنز ہوں گے۔

فسٹیول کے موقع پر ایک بار پھر ریڈ کارپٹ بچھایا جائے گا جہاں فلم ساز، اداکار اور انڈسٹری کے ماہرین اپنی کامیابیوں کا جشن منانے کے لیے اکٹھے ہوں گے۔

اس کے علاوہ ایوارڈز کی تقریب منعقد ہوگی جس میں فلمی دنیا سے متعلق نامور ججز کی جانب سے مختلف زمروں کی فلموں کو ایوارڈز دیے جائیں گے۔

فیسٹیول میں22  پروڈکشن کمپنیوں کے بوتھ ہوں گے، جہاں نیٹ ورکنگ کے مواقع حاصل کرنے کے لیے فلم ساز  اپنے پروجیکٹ پیش کر سکیں گے۔

اس کے علاوہ عالمی فلمی تعاون کے تحت فرانس کے کلیئر مونٹ-فیرانڈ انٹرنیشنل شارٹ فلم فیسٹیول کی 12 منتخب مختصر فلمیں بھی نمائش کے لیے پیش کی جائیں گی۔

فلم فیسٹیول میں جاپانی سنیما کو خصوصی توجہ دی جا رہی ہے  جس میں سعودی عرب اور جاپان کے 70 سالہ سفارتی تعلقات کے موقع پر 8 جاپانی فلموں کی نمائش ہو گی۔