ویمنز کرکٹ ورلڈ کپ :انگلینڈ نے فائنل جیت لیا

لارڈز: ویمنز ورلڈ کپ کے فائنل میں دلچسپ اور سنسنی خیز مقابلے کے بعد میزبان انگلینڈ نے ہندوستان کو 9 رنز سے شکست دے دی۔ انگلینڈ نے چوتھی مرتبہ یہ اعزاز حاصل کیا۔ اس سے قبل انگلینڈ ٹیم نے 1973، 1993 اور 2009 میں  ویمنز ورلڈ کپ جیتے ہیں۔ 229 رنز کے تعاقب میں ہند کی 191 رنز پر صرف 4 وکٹیں گری تھیں اور ایسا محسوس ہورہا تھا کہ ہند فائنل جیتنے میں کامیاب ہوجائے گا لیکن اینا شربسول کی تباہ کن بولنگ کے سامنے ہند کی ٹیل اینڈرز میں سے کوئی بھی وکٹ نہ ٹھہر سکی۔ انگلینڈ نے پہلے کھیلتے ہوئے 228 رنز بنائے تھے اور ہند کو میچ جیتنے کے لئے 229 رنز کا ہدف دیا۔ تعاقب میں 48.4 اوور میں 219 رنز بنا کر ہند کی پوری ٹیم پویلین لوٹ گئی۔انگلینڈ کی شربسول نے 46 رنز دے کر 6کھلاڑیوں کو آوٹ کیا اورمیچ کی بہترین کھلاڑی قرار پائیں۔ انگلینڈ کی بومونٹ کو پلیئر آف دی ٹورنامنٹ کے ایوارڈ سے نوازا گیا۔ ہند کی جانب سے پونم روت اور ہرمن پریت کور نے سب سے زیادہ اسکور کیا ۔ دونوں نے ہی نصف سنچریاں بناتے ہوئے 86 اور 51 رنز بنائے ۔ ان کے علاوہ صرف کرشنا مورتی ہی 35 رنز بنا سکیں۔ ہند کی آخری آوٹ ہونے والی کھلاڑی گائیکواڈ تھیں جو کوئی رن نہ بنا پائیں۔ اس سے قبل شرما 14 ، شیکھا پانڈے 4 جبکہ سمرتی مندھانا، دیوی، سشما ورما اور جھولن گوسوامی بغیر کوئی رن بنائے بغیر آوٹ ہوئیں۔ کپتان میتھالی راج 17 رنز بنا کر رن آوٹ ہوئیں۔ اس سے قبل انگلینڈ کی ٹیم مقررہ 50 اوورز میں 7وکٹوں کے نقصان پر 228 رنز بنا پائی تھی۔انگلینڈ نے ٹاس جیت کر پہلے بیٹنگ کا فیصلہ کیا اور اس کی دونوں اوپنرز نے بڑے پراعتماد انداز میں اننگز کا آغاز کیا لیکن اوپنرز کے آوٹ ہونے کے بعد یکے بعد دیگرے وکٹیں گرتی چلی گئیں۔ 47 کے مجموعی ا سکور پر گائیکواڈ کی گیند پر اوپنر ونفیلڈ جو عمدہ کھیل رہی تھیں، بولڈ ہو گئیں۔ ان کے کچھ دیر بعد دوسری اوپنر بومونٹ انڈین بولر پونم یادو کی ایک فل ٹاس گیند کو اونچا کھیلتے ہوئے گوسوامی کے ہاتھوں کیچ آوٹ ہو گئیں۔ اس وقت کل ا سکور 60 تھا۔ دونوں اوپنر نے بالترتیب 24 اور 23 رنز بنائے۔ ہند کو جلد ہی تیسری وکٹ اس وقت ملی جب نائٹ صرف ایک رن ا سکور کر کے پونم کی گیند پر ایل بی ڈبلیو ہو گئیں۔ انگلینڈ کی چوتھی وکٹ 146 کے ا سکور پر گری جب وکٹ کیپر سارہ ٹیلر 45 رنز بنانے کے بعد جھولان گوسوامی کی گیند پر دیوی کے ہاتھوں کیچ آوٹ ہوئیں۔ 146 کے اسکور پر ہی انگلینڈ کی پانچویں بیٹسمین سائیور نے بہترین بیٹنگ کرتے ہوئے اپنی نصف سنچری مکمل کی لیکن وہ بھی گوسوامی کی عمدہ بولنگ کا شکار بنیں اور 51 کے ا سکور پر ایل بی ڈبلیو آوٹ ہو گئیں۔ جب ا سکور 196 پر پہنچا تو برنٹ 34 رنز بنانے کے بعد شرما کے ہاتھوں رن آوٹ ہو گئیں۔ آخری اوورز میں گن اور مارش نے تیز کھیل کر ا سکور کو 196 سے 228 پر پہنچا دیا۔ دونوں کھلاڑی ناٹ آوٹ رہیں۔ فائنل میں انگلینڈ اور ہند دونوں نے اپنی ٹیموں میں کوئی تبدیلی نہیں کی۔