وراٹ کوہلی نے رنکو سنگھ کو اپنا بیٹ دینے سے انکار کیوں کیا؟

انڈین پریمیئر لیگ کی فرنچائز رائل چیلنجرز بینگلور کے سٹار بیٹر وراٹ کوہلی نے کولکتہ نائٹ رائڈرز کے کھلاڑی رنکو سنگھ کو اپنا بیٹ دینے سے انکار کر دیا۔

اتوار کے روز دونوں ٹیموں کے میچ سے قبل رنکو سنگھ کی وراٹ کوہلی سے ملاقات ہوئی جس میں انہوں نے وارٹ کوہلی سے کہا کہ ’آپ نے پہلے جو بیٹ مجھے دیا تھا وہ ٹوٹ گیا ہے۔‘

کولکتہ نائٹ رائڈرز کے کیمرہ مین نے دونوں کھلاڑیوں کی ملاقات کی ویڈیو بنا کر اپنی ٹیم کے سوشل میڈیا اکاؤنٹس پر اپلوڈ کی ہے جو اس وقت انٹرنیٹ پر وائرل ہو چکی ہے۔

ویڈیو میں دیکھا جا سکتا ہے کہ رنکو نے وراٹ کو بتایا کہ ’آپ نے تحفے میں جو بیٹ مجھے دیا تھا وہ ٹوٹ گیا ہے‘، جس پر وارٹ نے کہا کہ اب وہ کیا کر سکتے ہیں؟ یہ بیٹ خراب ہو چکا ہے۔

بات چیت کے دوران رنکو نے وراٹ کا نیا بیٹ اٹھایا اور اس پر بال سے ناکنگ کرنے لگے اور وراٹ سے بولے ’پھر کیا آپ نیا بیٹ بھیج رہے ہیں؟‘ 

وارٹ کوہلی نے جواب میں کہا کہ ’ایک میچ کے لیے تم بیٹ لے گئے اب دوسرے میچ کے لیے ایک اور بیٹ دوں؟ تمہاری وجہ سے بعد میں میری جو حالت ہوتی ہے نہ۔۔۔‘

رنکو نے وراٹ سے کہا کہ ’آپ کی قسم دوبارہ نہیں توڑوں گا، آئیں آپ کو ٹوٹا ہوا بیٹ دکھاتا ہوں۔‘

کوہلی کے مطابق اگر وہ اپنے بیٹ بانٹتے رہے تو ٹورنامنٹ میں خود کیا کریں گے، جس کی وجہ سے انہوں نے رنکو کو نیا بیٹ دینے سے انکار کیا اور ڈریسنگ روم میں واپس چلے گئے۔